«Ռոյթեր» լրատվական գործակալության հաղորդագրության համաձայն, փետրվարի 18-ին ծավալված ընդհարումների հետևանքով Կիևում սպանվել է առնվազն 18 քաղաքացի, որոնցից 7-ը` ոստիկաններ։
Սա ամենածանր բախումն է Ուկրաինայում` անցած տարվա նոյեմբերից մեկնարկած բողոքի զանգվածային ակցիաների ընթացքում։ Բուժօգնության է դիմել ավելի քան 150 մարդ, որոնցից մոտ 40-ը հրազենից է վիրավորվել։ Տուժածներից 30-ը ծանր վիճակում է։
Կիևից ստացվել է հաղորդագրություն այն մասին, որ նախագահ Վիկտոր Յանուկովիչի վարչակարգը որոշել է ընդդիմության ակտիվիստներին դուրս մղել Մայդանից` ցույցերի էպիկենտրոն Անկախության հրապարակից։
Իշխանությունները պնդում են, որ առճակատման սրման համար պատասխանատվությունն ընդդիմության լիդերներն են կրում։ Այդ մասին հեռուստատեսությամբ հայտարարել է Ուկրաինայի գլխավոր դատախազ Վիկտոր Պշոնկան, ով ասել է, թե «ընդդիմությունը զինված գրոհ է ձեռնարկել»։
Կարդացեք նաև
Ընդդիմությունն, իր հերթին, պնդում է, որ ցուցարարների վրա առաջինը հարձակվել է «Բերկուտը»` Ուկրաինայի ոստիկանության հատուկ ջոկատը։
Մայդանը «մաքրելու» նպատակով ոստիկանների գործողությունը Կիևում սկսվել է տեղական ժամանակով երեկոյան ժամը 8-ին։
Արևմտյան երկրների մի շարք ղեկավարներ Ուկրաինայի իշխանություններին և ընդդիմությանը կոչ են արել անհապաղ դադարեցնել ընդհարումները և երկխոսություն սկսել։
Նյութի մանրամասները կարդացեք «Ազատություն» ռադիոկայանի կայքում
