«Կառավարությունը փորձում է իր այս զիջումներով մեզ դնել մի իրավիճակի առաջ, որ մենք բոլորս արձանագրենք, որ փաստի առաջ ենք»,-անդրադառնալով «կուտակային» լրամշակված նախագծի վտանգներին` այսպիսի կարծիք հայտնեց «Քաղաքացիական պայմանագիր» նախաձեռնության անդամ, ԱԺ ՀԱԿ խմբակցության պատգամավոր Նիկոլ Փաշինյանը:
Հիշեցնենք, որ այսօր խորհրդարանը 67 կողմ, 29 ձեռնպահ և 18 դեմ ձայներով` հավանության արժանացրեց կառավարության ներկայացրած լրամշակված նախագիծը` «կուտակայինի» մասին:
Պարոն Փաշինյանը մանրամասնեց, թե նոր նախագծի առաջացրած խնդիրը որն է. «Խնդիրը այն է, որ կառավարության բերած նախագծով պետական բյուջեն վճարումների իր մասնաբաժինն անում է: Այս ընդվզման արդյունքում կառավարությունը հնարավորություն տվեց քաղաքացիներին և գործատուներին չվճարել իրենց մասնաբաժինը, բայց պետբյուջեին նրանց մասնաբաժինները վճարված են: Սա վատ է նրանով, որ պարտադիր կուտակային համակարգի թափանիվը պտտվում է և գնալով թափ է հավաքել: Սա մատնում է կառավարության մտադրությունը՝ սեպտեմբերին գալ ու ասել, որ այս համակարգն աշխատում է, և այս համակարգը պետք է հետ վերադարձնել»:
Տաթև ՀԱՐՈՒԹՅՈՒՆՅԱՆ
