«Սա շատ տրամաբանական եւ ակնկալվելիք քայլ էր, քանի որ հայեցակարգում մասնագիտական հանձնաժողովն առանձնացրել էր մի շարք քաղաքական բնույթի հիմնադրույթներ, հարցադրումներ` նկատելով, որ դրանց առնչությամբ հանձնաժողովը կարող է շարունակել իր աշխատանքները, եթե լինի քաղաքական փոխհամաձայնություն: Իսկ դա ճշգրտելու համար ենթադրվում է, որ ողջամիտ ժամկետ է անրաժեշտ: Քաղաքական զարգացումներ պետք է լինեն, որի արդյունքում համաձայնություն ձեռք կբերվի կամ` ոչ»,- Aravot.am-ի հետ զրույցում ասաց Սահմանադրական բարեփոխումների մասնագիտական հանձնաժողովի անդամ Գեւորգ Դանիելյանը:
Նախագահի մամուլի խոսնակ Արման Սաղաթելյանն օրերս հայտարարեց, որ սահմանադրական բարեփոխումների մասին Սերժ Սարգսյանի վերջնական դիրքորոշումը, ըստ ամենայնի, հայտնի կլինի հաջորդ տարվա փետրվար-մարտ ամիսներին։ Ոչ իշխանական քաղաքական ուժերը դա վերագրեցին իրենց ճնշումներին, որոնց ազդեցության տակ իշխանությունը սկսեց ընկրկել:
Մեր զրուցակիցը չի ցանկանում քաղաքական հարցերի մասին խոսել, դրանք թողնում է քաղաքական գործիչներին: «Կարծում եմ, որ ժամկետը, որը կանխորոշվել է հանրապետության նախագահի կողմից, իսկապես ողջամիտ է: Չափից դուրս ձգձգելը ճիշտ ու հիմնավորված չէր լինի: Սեղմ ժամկետն էլ տրամաբանական ու իրավաչափ չէր լինի»,- ասաց Գ.Դանիելյանը`զարմանալով, թե ինչո՞ւ են անգամ քաղաքական գործիչներն անակնկալի հարթությունում դիտարկում Սերժ Սարգսյանի այդ որոշումը:
Նելլի ԳՐԻԳՈՐՅԱՆ
