Այսօր, «Դինամո» մարզադահլիճում, տեղի ունեցավ պատանիների, երիտասարդների եւ մեծահասակների կարատեի 3-րդ բաց առաջնությունը, որն անցկացվում էր ՀՀ ճապոնական կարատեի ասոցիացիան:
500-ից ավելի մարզիկների թվում առաջին անգամ կարատեի առաջնությանը մասնակցում էին նաեւ «Դու կարող ես պաշտպանել ինքդ քեզ» նախագծում ընդգրկված Տարածքային կառավարման եւ արտակարգ իրավիճակների նախարարության սայլակավոր հաշմանդամություն ունեցող աշխատակիցներ:
Նրանցից Գոհար Նավասարդյանը, որն այդ մրցույթում զբաղեցրեց 3-րդ տեղը՝ կարատե սկսել է պարապել ընդամենը մի քանի ամիս եւ արդեն մեծ սիրով ցանկանում է շարունակել եւ ներկայանալ միջազգային ասպարեզում:
Aravot.am-ի հետ զրույցում Գոհար Նավասարդյանը նշեց. «Ինձ համար կարեւոր չէր՝ ինչ տեղ կզբաղեցնի, կարեւորը այն էր, որ վերջում, երբ նայեի սենսեիս աչքերին, նա ինձ ժպտար»:
Կարդացեք նաև
Առաջին տեղը զբաղեցրել էր Արտյոմ Սահակյանը, իսկ երկրորդ տեղը՝ Նաիրա Աղաբեկյան: Նրանց մարզիչ Սեւակ Հակոբյանը մեր հետ զրույցում նշեց, որ հաճույքով է հաշմանդամության խնդիր ունեցող մարդկանց հետ աշխատում, քանի որ նրանք կամային ամուր մարդիկ են, որոնցից նա դեռ սովորելու բան ունի: «Հետաքրքիր բնավորություն ունեն՝ երբեք չեն քննադատում մարդկանց, վատ բան չեն խոսում, միշտ ուրախ են, միշտ ջանում, փորձում են անելб այն ինչ նրանցից պահանջվում է: Բոլորը շատ վառ անհատականություններ են»,-նշեց մարզիչը: Նա ասաց, որ մրցումը եւս մեկ անգամ կոչ է բոլոր ժողովրդին, որ բոլոր մարդիկ հավասար են եւ ունեն հավասար իրավունքներ ցանկացած պարագայում:
«Ոչ գրանտներ ենք շահել, ոչ ֆինանսավորվում ենք, ուղղակի անում ենք, որ մենք էլ մեզ մարդ զգանք, որ մեր հասարակությանը մի քիչ օգուտ ենք տալիս»,-ասաց Սեւակ Հակոբյանը:
Անուշ ՄԱԹԵՒՈՍՅԱՆ
