«Քաղաքական դաշտը մի քիչ աշխուժանում է, նորից փորձում են վախի մթնոլորտ ստեղծել»,- Aravot.am-ի հետ զրույցում, երեկ Սմբատ Հակոբյանի հետ տեղի ունեցածն այսպես բացատրեց «Ազատամարտիկների դաշինքի» համակարգող, ՊՆ նախկին փոխնախարար Գագիկ Մելքոնյանը: «Դա իրենց մոտ արդեն տրադիցիա է դառնում»,- ասաց նա:
Aravot.am-ի դիտարկմանը, որ Սմբատ Հակոբյանի արած հայտարարությունից այդքան էլ հստակ չի երեւում, որ ծեծի պատվիրատուն Ռուբեն Հայրապետյանն է, մեր զրուցակիցն ասաց. «Ինքը չի կարող պնդի, ինքը քննի՞չ ա, ի՞նչ ա: Ինքը հայտարարություն արեց, թե ով է եղել դրանց մեջ: Հիմա մեր իրավապահ մարմինները արդեն կարան իրանք պարզեն՝ ինքը կապ ունի՞, թե՞ չունի: Բայց իրանք միշտ էլ կապ չունեն: Էդ ո՞ր ծեծ ու ջարդի հետ են իրանք կապ ունեցել, որ»:
Այլ մանրամասները՝ տեսանյութում
Հիշեցնենք, ժամանակին Ռուբեն Հայրապետյանը բավական դրվատանքով էր խոսել Սմբատ Հակոբյանի մասին՝ «Նուվել դ’Արմենի Մագազին» ֆրանսիական պարբերականին տված իր հայտնի հարցազրույցում:
Կարդացեք նաև
Հարցազրույցից հետո, արդեն հայաստանյան լրատվամիջոցներին տված հարցազրույցում էլ Սմբատ Հակոբյանը Ռուբեն Հայրապետյանի մասին ասել է. «Ռուբեն Հայրապետյանն այն կերպարներից է, որ երբեք իր արած լավ բաների մասին չի խոսում` դրոշն առած: Ես հարյուրավոր փաստեր կարող եմ բերել, որոնց հասարակությունը տեղյակ էլ չէ: Իսկ ինչ վերաբերում է Ձեր կոնկրետ հարցին, Ռուբեն Հայրապետյանը, այո, մասնակցել է մարտական գործողություններին: Եվ ավելին է արել շատ շատերից, ովքեր այսօր շքանշաններ ունեն կամ գեներալի ուսադիրներ են կրում:
Ես ասեմ. ճիշտ է, պատերազմական լուրջ գործողությունները սկսվել են 1992 թ. գարնանից, բայց ամենածանր շրջանը եղել է 1989, 1990, 1991 թթ.: Եվ նրանցից շատ շատերը, ովքեր այսօր հորինել ու լեգենդներ են դարձրել իրենց կենսագրությունները, այդ ծանր տարիներին փախել էին ռուսաստաններ կամ տնից ընդհանրապես դուրս չէին գալիս: Իսկ երբ պետությունը սկսեց կազմավորվել, և երբ արդեն հնարավոր էր նաև ինչ-որ բան փախցնել ու լցնել սեփական գրպանը, իսկույն հայտնվեցին:
Ես շատ ուրախ եմ, որ Ռուբեն Հայրապետյանն այդ դասին չի պատկանում: Նա ռազմաճակատի առաջին գծում օրերով մեզ հետ մնացել ու կռվել է: Ես լուսանկարներ էլ ունեմ, տեսանյութեր էլ ունեմ, որ կարող եմ ներկայացնել»:
Նելլի ԳՐԻԳՈՐՅԱՆ
Հ. Գ. Նշենք նաեւ, որ Սմբատ Հակոբյանի կողմից նշված Տիգրան անունով անձը բերման է ենթարկվել ՀՀ ոստիկանություն եւ հարցաքննվել է: Սմբատ Հակոբյանին ծեծի ենթարկելու դեպքով նախապատրաստված նյութերը շուտով ուղարկվելու են ՀՀ քննչական կոմիտե:
