Aravot.am-ի տեղեկություններով, հուլիսի 22-ին Արտաշատի բնակիչներից մեկը տարօրինակ պատմությունների մեջ է հայտնվել Գյումրիում։
Այդ օրը՝ ժամը 22։00-ի սահմաններում, նա Գյումրու Անի թաղամասի Տրդատ Ճարտարապետ փողոցի հարակից այգում հայհոյանքներ հնչեցնելու համար դիտողություն է արել իրեն անծանոթ երեք անձանց, որոնք ծեծի են ենթարկել նրան։ Նա վայր է ընկել, ինչի հետևանքով մարմնական վնասվածքներ է ստացել։
Սակայն փորձանքը սրանով չի ավարտվել․ այդ նույն թաղամասում գտնվող նախկին թիվ 37 դպրոցի մոտակայքում էլ թափառող շներն են վրա տվել ու կծել նրա ձախ սրունքը։
Նա ժամը 23։30-ի սահմաններում «ձախ վերակնակապճային շրջանի պատռված վերք, վերին շրթունքի հեմատոմա, ձախ սրունքի շան կծած վերք» ախտորոշմամբ բուժօգնության է դիմել Գյումրի բժշկական կենտրոն։
Կարդացեք նաև
Փաստի առթիվ Շիրակի մարզային քննչական վարչությունում մի քանի օր առաջ նախաձեռնվել է քրեական վարույթ՝ ՀՀ քրեական օրենսգրքի 167-րդ հոդվածի 2-րդ մասի 7-րդ կետի հատկանիշներով (առողջությանը միջին ծանրության վնաս պատճառելը՝ մի խումբ անձանց կողմից)։
Ոստիկանությունը աշխատանքներ է տանում նրան ծեծի ենթարկած երեք անձանց ինքնությունը պարզելու, նրանց հայտնաբերելու ուղղությամբ։
