Գերմանացի Լյուդվիգ Մերցը, ֆրանսիացի Ռեմի Ֆերնանդես-Դանդրեն և ֆրանսահայ Կարեն Կուլակյանը արևային մարտկոցներով աշխատող էլեկտրական «Տուկ-տուկ» մեքենայով նախատեսել են 120 օրում անցնել 20 հազար կմ՝ Թաիլանդից մինչև Ֆրանսիա։
Նպատակն է ցույց տալ աշխարհին, որ էլեկտրականությունը հնարավոր է դարձնել տրանսպորտի միջոցների էներգիայի հիմնական աղբյուր և այդպիսով բնությանը վնասներ չհասցնել:
Թաիլանդի մայրաքաղաք Բանգկոկից նրանք ուղևորվել են Լաոս, Չինաստան, Ղրղըզստան, Ղազախստան, Ռուսաստան, Վրաստան: Այսօր Հայաստանում էին, որից հետո ճանապարհը կշարունակեն Թուրքիայով, Բուլղարիայով և, շրջանցելով Ալպերը, կհասնեն Ֆրանսիայի հարավում գտնվող Թուլուզ քաղաք:
Կարեն Կուլակյանի խոսքով` Թաիլանդում «Տուկ-տուկ» մեքենաները բավականին տարածված են և զբոսաշրջիկների սիրելի զվարճալիքներից մեկն են:
Ռեմի Ֆերնանդես-Դանդրեի փոխանցմամբ` մեքենան աշխատում է տանիքի վրա տեղադրված արևային էներգիայի կուտակիչների և լիցքավորվող էլեկտրական մարտկոցի շնորհիվ: Մեքենան հոսանքով լիցքավորելուց հետո կարող է անցնել մինչև 350 կմ և հավաքել մինչև 70 կմ/ժ արագություն:
«Այս մեքենան վարելը շատ հեշտ է,- ասում է Ֆերնանդեսը,- և վառելիքով աշխատող մեքենաների նման ձայն չի հանում, լրիվ անձայն է, ինչը հրաշալի հնարավորություն է տալիս վարելու ընթացքում լսել նաև թռչունների ձայնը»:
Սիրանուշ ՀԱՅՐԱՊԵՏՅԱՆ
