Դաշնակցության անդամներն այսօր սահմանադրական փոփոխությունների քարոզարշավի շրջանակներում հանդիպեցին Թալինի բնակիչների հետ:
ԵՊՀ երկրաբանության ֆակուլտետի դաշնակցական դեկան Մարատ Գրիգորյանը (լուսանկարում) հանդիպման ժամանակ անդրադարձավ շատ քննարկվող հարցին, թե արդյոք այս փուլում սահմանադրական փոփոխություններն անհրաժեշտությո՞ւն էին, թե՞՝ ոչ:
«Ասում են՝ շատ ավելի կարեւոր խնդիրներ կային, քան սահմանադրությունը: Այո՛, խնդիրներ կան ու միշտ կլինեն, բայց սահմանադրական փոփոխությունները՝ կառավարման համակարգի փոփոխության հարցը անկախության տարիներից է դեռ դրված եղել… այս փոփոխություններով կուսակցությունների բազմակենտրոն կառավարմանն ենք անցնում ու հույսեր ենք կապում, որ կբարելավենք երկրի վիճակը»,- ասաց դեկանը:
Անդրադառնալով շրջանառվող հաջորդ մտահոգությանը, թե նոր Սահմանադրությունը իշխանությունների վերարտադրման համար է արվում, պարոն Գրիգորյանը շարունակեց. «Մեզ մեղադրում են, թե իշխանությունների կողքին ենք կանգնել, բայց այս հարցում իշխանություններն են մեզ հետ, որովհետեւ մենք ենք այս փոփոխությունների նախաձեռնողները»:
Կարդացեք նաև
Դեկանի համոզմամբ, նոր Սահմանադրությունը կնպաստի կուսակցությունների կայացմանը, իսկ, ըստ նրա, կուսակցությունները անկախության տարիներին չկայացան, դրանք ծնվում են օլիգարխների հետ հեռանում օլիգարխների հետ. «Կուսակցությունների կայացման հնարավորություն ենք ստեղծում, խամաճիկ, գրպանային կուսակցությունները տեղ չեն ունենա: Կառավարման նոր ձեւը համակարգային փոփոխություն է, որին դաշնակցությունը միշտ կողմ է եղել, այս փոփոխությունները մեր երկրի շատ կարեւոր հարցերի լուծմանը կնպաստեն»:
Արփինե ՍԻՄՈՆՅԱՆ
