Այսօր, Ազգային անվտանգության ծառայության աշխատակիցները նշեցին մասնագիտական տոնը` Հայաստանի Հանրապետության ազգային անվտանգության մարմինների աշխատողի օրը: Տոնի առթիվ հրավիրված հանդիսավոր նիստում ՀՀ ԱԱԾ տնօրեն գեներալ-գնդապետ Գորիկ Հակոբյանը ընթերցեց ՀՀ նախագահ Սերժ Սարգսյանի շնորհավորական ուղերձը: Այնուհետեւ նա հանդիսավոր նիստի մասնակիցներին իր խոսքով դիմեց.
«Մեծարգո պարոն վարչապետ:
Հարգելի հյուրեր, գործընկերներ, սիրելի վետերաններ:
Ջերմորեն շնորհավորում և լավագույն մաղթանքներս եմ հղում Հայաստանի Հանրապետության ազգային անվտանգության ծառայության ողջ անձնակազմին, համակարգի վաստակաշատ վետերաններին` մասնագիտական տոնի կապակցությամբ:
Կարդացեք նաև
2015 թվականը, ինչպես բոլոր նախորդ տարիները, հագեցած էր զանազան իրադարձություններով, սակայն ազգային անվտանգության մարմինների համար այն առանձնահատուկ աշխատանքային տարի էր հետևյալ պատճառներով`
նախ. գարնանը մեր երկիրը և աշխարհասփյուռ հայությունը նշեցին Ցեղասպանության 100-րդ տարելիցը, որի շրջանակներում տեղի ունեցան հիշատակի բազմաթիվ միջոցառումներ: Հայաստանի տարածքում այդ միջոցառումներին մասնակցեց միլիոնից ավելի մարդ: Ի պատիվ Ազգային անվտանգության ծառայության ողջ անձնակազմի և հատկապես օպերատիվ ստորաբաժանումների, ինչպես նաև հանրապետության այլ իրավապահ մարմինների, պետք է նշեմ, որ որևէ լուրջ միջադեպ, հասարակական անվտանգությանը սպառնացող որևէ իրավախախտում միջոցառումների ամբողջ ժամանակահատվածում տեղի չունեցավ, որի համար շնորհակալություն եմ հայտնում Ձեզ: Միաժամանակ հարկ է նշել, որ ապրիլյան օրերին որոշ քաղաքական ուժեր անամոթաբար փորձեցին Երևանում մարդկանց աննախադեպ զանգվածային հոսքերն օգտագործել իրենց նեղ քաղաքական նպատակների համար: Ավելորդ է նշել անգամ, թե ինչ ողբերգական հետևանքների դա կարող էր բերել: ՈՒ չնայած այդ ուժերի գործադրած ջանքերին ու ծախսած ֆինանսներին, նրանց գաղափարները հայ հասարակության մոտ որևէ արձագանք չգտան:
Արտասահմանյան մի շարք երկրներում Ցեղասպանության 100-րդ տարելիցին նվիրված միջոցառումների անցկացմանը խոչընդոտելու փորձեր են կատարվել ադրբեջանական և թուրքական հատուկ ծառայությունների կողմից` տեղական համայնքային կառույցների ակտիվ ներգրավմամբ: Նրանց սադրիչ գործողությունների և հակահայկական ակտիվ քարոզչական նախաձեռնությունների խափանման գործում էական դեր են խաղացել Ազգային անվտանգության ծառայության հետախուզության գլխավոր վարչության ձեռք բերած կանխարգելիչ տեղեկությունները, որոնց շնորհիվ այդ մտադրությունները ժամանակին բացահայտվել և կանխվել են.
եվ երկրորդը. անցնող տարվա ընթացքում ադրբեջանական զինված կազմավորումները մի քանի անգամ փորձեցին սրել իրավիճակը շփման գծում` դիմելով դիվերսիոն-հետախուզական անցումների, որոնք բոլորը տապալվեցին: Սահմանամերձ բնակավայրերի անվտանգության ապահովման, հետախուզական ներթափանցումների կանխարգելման և խափանման գործում ևս ազգային անվտանգության մարմինները, համագործակցելով բանակի և ոստիկանության համապատասխան ստորաբաժանումների, տարածքային կառավարման և տեղական ինքնակառավարման մարմինների հետ, կարողացան կատարել իրենց առջև դրված խնդիրը` զերծ պահելով մեր բնակչությանը հակառակորդի վնասակար գործունեությունից:
Միաժամանակ չեն դադարում այլ ուղղություններով Հայաստանի Հանրապետության դեմ ադրբեջանական հատուկ ծառայությունների թշնամական նկրտումները և սադրիչ գործողությունների փորձերը: Դրանց խափանման, ինչպես նաև ազգային անվտանգության մարմինների առջև օրենքով դրված այլ խնդիրների` պատշաճ որակով կատարման անհրաժեշտությամբ պայմանավորված` ընթացիկ տարում իրենց գործունեությունն են կառուցել Ծառայության հետախուզության, հակահետախուզության, ռազմական հակահետախուզության, սահմանադրական կարգի պահպանության և ահաբեկչության դեմ պայքարի, սահմանապահ զորքերի և մյուս մարմիններն ու ստորաբաժանումները:
Հետախուզության աշխատանքի կարևոր ուղղություններից է եղել մերձավորարևելյան տարածաշրջանում, հատկապես Սիրիայում ստեղծված պատերազմական իրավիճակի պայմաններում հայ համայնքի անվտանգության ապահովմանը հնարավորինս օժանդակելը:
Մերձավոր Արևելքում տեղի ունեցող արյունալի զարգացումներն այսօր անհնար է շրջանցել: Չնայած նրան, որ այն, ինչ այս պահին տեղի է ունենում, անմիջական, ուղիղ կապ չունի Հայաստանի Հանրապետության հետ, բայց սիրիահայության արտագաղթը, ինչպես նաև փախստականների չդադարող հոսքերը, մասնավորապես դեպի Հայաստան, մեզ խորհելու հիմք են տալիս: Պետք է հասկանալ, որ եթե Սիրիայի և Իրաքի համար պատուհաս դարձած, աշխարհի բազմաթիվ երկրներում ահաբեկչություններ իրականացրած <<Իսլամական պետություն>> կոչեցյալ չարիքը շարունակի գլուխ բարձրացնել ու ծավալվել, ապա կհասնի նաև Հյուսիսային Կովկաս, ինչն անմիջականորեն սպառանալիքի տակ կդնի նաև մեր երկրի շահերը: Եվ մենք պետք է պատրաստ լինենք, գործընկեր-պետությունների անվտանգության մարմինների հետ համագործակցությունը զարգացնելով, համատեղ ջանքերով չեզոքացնել բոլոր հնարավոր սպառնալիքները:
Այս և այլ, ոչ պակաս կարևոր ուղղություններով ազգային անվտանգության մարմիններին և, առաջին հերթին, հետախուզությանն անհրաժեշտ է հետևողականորեն զարգացնել սեփական գործունեության արդյունավետությունը: Իրականացված աշխատանքի հետ մեկտեղ, հետախուզության գործունեության մեջ արձանագրվել են նաև որոշ բացթողումներ, որոնց վերացման ուղղությամբ ձեռնարկվել են համապատասխան միջոցառումներ:
Արցախյան պատերազմից ի վեր ազգային անվտանգության մարմինների հակահետախուզական ստորաբաժանումների գործունեության առանցքը կազմում է ադրբեջանական հատուկ ծառայությունների և նրանց աջակցող Թուրքիայի համանման կառույցների հետախուզական-քայքայիչ գործունեության դեմ պայքարը: 1993 թվականից մինչ օրս Հայաստանի ազգային անվտանգության մարմինների կողմից Ադրբեջանի ու Թուրքիայի 15 գործակալներ են բացահայտվել և դատապարտվել: Իսկ քանի՞ գործակալ են ի հայտ բերել նրանք: Բառացիորեն զրո: Բանը հասել է նրան, որ ադրբեջանցի իրավապաշտպան Լեյլա Յունուսին դատապարտում են` փորձելով կապել նրան Հայաստանի ազգային անվտանգության մարմինների հետ: Դա մեզ մոտ ընդամենը քմծիծաղ է առաջացնում:
Մեկ այլ հանգամանք ևս: Վերջերս Բաքվում տեղի է ունեցել թյուրքալեզու երկրների հատուկ ծառայությունների ղեկավարների հանդիպում: Բնականաբար, մենք դեմ չենք դրան, և դա մեզ չէր վերաբերի, եթե չլինեին Ադրբեջանի հատուկ ծառայությունների ղեկավարների փորձերը` օգտագործել իրենց գործընկեր հատուկ ծառայություններին Հայաստանի Հանրապետության շահերի դեմ: Այդ երևույթը մեզ համար նոր չէ: Սակայն, նրանք պետք է հասկանան, որ դա անհեռանկար ու անիմաստ զբաղմունք է: Ժամանակն ու պատմությունը ցույց կտան, որ այս պայքարն ընթանում է բացառապես Հայաստանի և Ադրբեջանի հատուկ ծառայությունների միջև: Որևէ օգնություն, որ կցուցաբերվի Ադրբեջանին, մինչ օրս չի տվել ու երբեք չի տա այն արդյունքը, որին ձգտում է Ադրբեջանը:
Հակառակորդի դեմ տարվող հակահետախուզական աշխատանքի գերակշիռ ծավալն այսօր կազմում են կանխարգելիչ միջոցառումները: Վերջին տարիներին պատրաստվել և զանգվածային լրատվամիջոցներով հեռարձակվել են ազգային անվտանգության մարմինների գործունեությունը լուսաբանող տասնյակից ավելի փաստավավերագրական ֆիլմեր, հրապարակվել են ադրբեջանական հատուկ ծառայությունների իրական նկրտումները և գործելաոճը բացահայտող բազմաթիվ հայտարարություններ, որոնք էականորեն նպաստել են նաև մեր հասարակության տեղեկացվածության աստիճանի և զգոնության բարձրացմանը:
Վերջին տարիներին տպավորիչ ցուցանիշներ են արձանագրվել նաև տնտեսության, մասնավորապես բանկային, կապի և տրանսպորտի ոլորտներում անվտանգության ապահովման, ինչպես նաև անօրինական միգրացիայի, կոռուպցիայի, կազմակերպված հանցավորության ու մաքսանենգության դեմ պայքարի ուղղություններում: Ազգային անվտանգության ծառայության հակահետախուզական ստորաբաժանումներն արձագանքում են թվարկված ոլորտներում տեղի ունեցող ցանկացած հանցավոր դրսևորմանը` անկախ նրանից, դրա կատարողը շարքային քաղաքացի է, բարձրաստիճան պաշտոնատար անձ, թե օտարերկրացի: Մասնավորապես, կաշառակերության և կոռուպցիոն բնույթի այլ հանցատեսակների բացահայտման ուղղությամբ կատարված աշխատանքի արդյունքում վերջին տարիներին պատասխանատվության են ենթարկվել դատական, պետական կառավարման և տեղական ինքնակառավարման մարմինների շուրջ 90 աշխատողներ: Ընդ որում, քրեական հետապնդումն իրականացվել է առանց խտրականության, այսինքն` տվյալ մարմիններում պաշտոնեական տարբեր դիրքեր զբաղեցնող անձանց նկատմամբ, և պատասխանատվությունից չեն խուսափել նաև բարձրաստիճան ծառայողները:
Ոչ պակաս կարևոր ուղղություններից է մնում կազմակերպված հանցավորության դեմ պայքարը: Ազգային անվտանգության ծառայության հակահետախուզական մարմնի կազմում ստեղծված են հատուկ ստորաբաժանումներ, որոնք զբաղվում են ծանր հանցագործությունների, մասնավորապես պատվերով սպանությունների օպերատիվ բացահայտմամբ: Վերջին նմանատիպ դեպքը, կապված Սյունիքի մարզպետի դեմ մահափորձի հետ, ցույց է տալիս, որ ոչ մի պատվերով սպանություն չբացահայտված չի մնա: Մեր ծառայության բարձր որակավորում ունեցող մասնագետները, որոնք այս պահին էլ զբաղվում են նման ծանր հանցագործությունների բացահայտման խնդիրներով, ունեն բոլոր պահանջվող որակները, նորագույն գիտելիքներն ու փորձը, որը կա աշխարհի ամենաարդյունավետը համարվող հատուկ ծառայություններում:
Ծառայության հակահետախուզական ստորաբաժանումների կողմից ձեռնարկված համալիր միջոցառումների արդյունքում կասեցվել է նաև օտարերկրյա քաղաքացիներից բաղկացած անդրազգային մի քանի հանցավոր խմբերի գործունեությունը, որոնք բանկային քարտերով Հայաստանի Հանրապետության տարածքում խարդախությամբ պատճառել են շուրջ 950 միլիոն դրամի վնաս, որն ամբողջությամբ վերականգնվել է:
Բացահայտվել են միջազգային մուտքային հեռախոսազանգերի ապօրինի ուղղորդումների, ինչպես նաև կապի օպերատորների նախկին ղեկավարների կողմից խոշոր գումարների յուրացման նպատակով 2,5 միլիոն դոլարից ավելի անապրանք գործարքների դեպքեր, որոնց արդյունքում պատճառված 830 միլիոն դրամի չափով վնասը նույնպես վերադարձվել է պետական բյուջե:
Հայաստանի Հանրապետություն տարբեր տեսակի ապրանքների մաքսանենգ ներկրումների խափանման արդյունքում վերականգնվել է պետական բյուջեին հասցված ավելի քան 1 մլրդ 200 մլն դրամի չափով վնասը:
Հակահետախուզական ստորաբաժանումների ուշադրության կենտրոնում է գտնվում նաև անօրինական միգրացիայի դեմ պայքարը: Տվյալ ուղղությամբ աշխատանքի արդյունքում բացահայտվել են նշված գործունեության կազմակերպման նոր ուղիներ և խմբեր, բաղկացած այդ թվում օտարերկրացիներից, որոնք ենթարկվել են քրեական պատասխանատվության:
Ակնառու ցուցանիշներ են արձանագրվել թմրամիջոցների ապօրինի շրջանառության դեմ պայքարի ուղղությամբ: Ձեռնարկված միջոցառումների արդյունքում ազգային անվտանգության ծառայությանը հաջողվել է բացահայտել Հայաստանի Հանրապետության տարածքով թմրամիջոցների տարանցիկ առաքման երկու ուղի. առաջինը` Լատինական Ամերիկայից Հայաստանով Թուրքիա, ապա դեպի Եվրոպա, իսկ մյուսը` Իրանից Հայաստանով Արաբական Միացյալ Էմիրություններ, ապա Մալայզիա: Ընդհանուր առմամբ բացահայտվել և խափանվել է նշված ուղիներով Հայաստանի Հանրապետության տարածք 1 տոննա <<Հերոին>>, շուրջ 23 կգ <<Կոկաին>>, 13 կգ <<Ափիոն>> և 36 կգ <<Մետամֆետամին>> տեսակի թմրանյութերի մաքսանենգ ներկրման փորձ: Տարբեր երկրների <<սև շուկաներում>> այս ամբողջ ծավալի գինը տատանվում է 100 միլիոն դոլարի սահմաններում:
Հարգելի գործընկերներ:
Դեռ անցյալ տարի մենք հայտարարեցինք, որ Ադրբեջանի հատուկ ծառայություններն ամեն ինչ անում են գոնե չնչին տեղեկություններ կորզելու համար մեր Զինված ուժերի մասին: Այդ նպատակով նրանք սկսեցին ակտիվորեն կիրառել համացանցի հնարավորությունները, և այդ մեխանիզմը շարունակում է գործել մինչ օրս: Երևում է` հատկացված փողերը չեն ծառայել իրենց նպատակին, այլ գնացել են ոմանց գրպանները, դրա համար էլ մինչև վերջ ուզում են ցույց տալ, թե իբր օրնիբուն աշխատում են այս ուղղությամբ: Բայց պետք է հիասթափեցնեմ նրանց, քանի որ այն, ինչ ձեռք են բերել, գրեթե ամբողջությամբ մեր մատուցած տեղեկատվությունն է: Եվ եթե իրենք իրենց սպաներին պարգևատրում են դրա համար, ապա դա իրենց գործն է:
Հակահետախուզության և ռազմական հակահետախուզության մարմինների համատեղ միջոցառումների արդյունքում բացահայտել են Ադրբեջանի հատուկ ծառայությունների աշխատակիցների կողմից օգտագործվող մի շարք պրոֆիլներ, որոնցով իրականացվում էր հետախուզական-քայքայիչ գործունեություն Հայաստանի զինված ուժերի նկատմամբ: Համացանցում իրականացվող օպերատիվ-հետախուզական աշխատանքների ընթացքում բացահայտվել և կալանավորվել են Ադրբեջանի հատուկ ծառայությունների հետ համագործակցող Հայաստանի երկու քաղաքացիներ: Զարհուրելին այն է, որ նրանք, չունենալով տվյալներ հայթայթելու հնարավորություն, այդ ստորացուցիչ գործին փորձել են ներքաշել սեփական զավակներին, որոնցից մեկը Լեռնային Ղարաբաղի Հանրապետության պաշտպանության բանակի ծառայող է, իսկ մյուսը պատրաստվում էր անցնել ծառայության: Զինծառայող որդին, ի հեճուկս ծնողի այդ դավադիր քայլի, ցուցաբերելով իսկական սպային վայել զգոնություն և հասկանալով, որ դա կարող է հակառակորդի լարած ծուղակ լինել, մերժել է ծնողի խնդրանքը:
Ռազմական հակահետախուզության ստորաբաժանումների կողմից զգալի աշխատանք է տարվել նաև զորակոչերի ընթացքում կոռուպցիոն դրսևորումների ի հայտ բերման ուղղությամբ: Մասնավորապես, իրականացվող օպերատիվ-հետախուզական միջոցառումների ընթացքում բացահայտվել, կանխվել ու խափավել են տարբեր բժշկական կենտրոնների աշխատողների կողմից կաշառքի դիմաց առանձին զինակոչիկների հիվանդության կեղծ եզրակացություններ տրամադրելու և ծառայությունից ազատելու դեպքեր: Նման երկու հանցավոր խմբերի գործունեության բացահայտման ընթացքում պարզվել է, որ հիվանդության կեղծ ախտորոշումներ են տրամադրվել 18 զինակոչիկների: 4 այսպես կոչված բժիշկներ և 2 զինակոչիկներ ձերբակալվել են, և նրանց համապատասխան մեղադրանքներ են առաջադրվել:
Ազգային անվտանգության մարմինների գործունեության առանցքային ուղղություններից մեկի` սահմանադրական կարգի պահպանության և ահաբեկչության դեմ պայքարի գծով ևս արդյունքներն ակնառու են: Այս ուղղությամբ իրականացված աշխատանքի ամենավառ օրինակը մեր երկրում նախադեպը չունեցող հանցավոր համագործակցության վնասազերծումն էր:
Դա տեղի ունեցավ շնորհիվ Ազգային անվտանգության ծառայության բոլոր օպերատիվ ստորաբաժանումների լարված աշխատանքի, իսկ հիմնական մշակումը վարել են Սահմանադրական կարգի պահպանության և ահաբեկչության դեմ պայքարի գլխավոր վարչության աշխատակիցները:
Առանձնապես ծանր հանցանքներ պլանավորած զինված հանցախմբի բացահայտման և ոստիկանության հետ համագործակցությամբ բարձր պրոֆեսիոնալ մակարդակով իրականացված հատուկ միջոցառման արդյունքում կանխվեցին հիրավի հրեշավոր վտանգներ: Դժվար է նույնիսկ պատկերացնել, թե հանցախմբի հնարավոր գործունեության դեպքում քանի զոհ ու այլ ծանր հետևանքներ կարող էին առաջանալ: Քաջ գիտակցելով, որ հանցախմբի անդամները մինչև ատամները զինված են` միջոցառման մասնակիցները գործեցին սեփական կյանքը վտանգելով, մի պահ անգամ չվարանելով ու չընկրկելով սպառնալիքի առաջ, և բարձր պատրաստվածության շնորհիվ խուսափելով նույնիսկ չնչին մարմնական վնասվածք հասցնելուց և ստանալուց:
Եվ հիմա այստեղ, իմ ծառայակից ընկերների ներկայությամբ, ես կրկին անգամ ուզում եմ շնորհակալություն հայտնել <<Ալֆա>> հատուկ ստորաբաժանման հրամանատարությանն ու մարտիկներին, ովքեր մասնակցություն են ունեցել միջոցառման կազմակերպմանն ու անցկացմանը:
Առանց ավելորդ գովաբանության պետք է փաստել, որ Սահմանադրական կարգի պահպանության և ահաբեկչության դեմ պայքարի գլխավոր վարչության ստեղծման օրվանից մինչև հիմա ահաբեկչական բնույթի որևէ գործողություն, որին մենք ականատես ենք լինում գրեթե ամեն օր աշխարհի տարբեր, այդ թվում` զարգացած անվտանգության և իրավապահ համակարգ ունեցող երկրներում, Հայաստանում չի կատարվել: Բայց դա ամենեևին չի նշանակում, թե այդպիսի փորձեր չեն ձեռնարկվել: Նշեմ միայն, որ մեր կողմից հավաստի տեղեկություններ են ստացվել տարբեր ահաբեկչական կազմակերպությունների գործունեությանը մասնակցած օտարերկրյա մի շարք քաղաքացիների մասին, որոնց մուտքը Հայաստան ժամանակին փակվել է:
Ազգային անվտանգության մարմինները շարունակում են այդ բնագավառում ակտիվ համագործակցությունը ինչպես Անկախ պետությունների համագործակցության, Հավաքական անվտանգության պայմանագրի կազմակերպության շրջանակներում, այնպես էլ` այլ միջազգային կառույցների և գործընկեր հատուկ ծառայությունների հետ:
Հարգելի գործընկերներ և հյուրեր:
Համատարած կոմպյուտերիզացիայի պայմաններում մեր գործունեության առաջնահերթություններից է դարձել պետական ապարատի տեղեկատվական համակարգերի անխափան գործունեության ապահովումը չարտոնված ներթափանցումներից, կամ, ինչպես ընդունված է ասել, հաքերային հարձակումներից:
Արդեն սովորական է դարձել, որ արձանագրված հարձակումների զգալի մասը կատարվում է Ադրբեջանի, իսկ որոշ մասը` Թուրքիայի տարածքից: Մենք պատրաստ էինք, որ Հայոց Ցեղասպանության 100-րդ տարելիցի կապակցությամբ հեռահաղորդակցման տեխնոլոգիաների ոլորտի վտանգներն ու սպառնալիքները կտրուկ աճելու են: Բայց, ի պատիվ Կառավարական կապի և տեղեկատվության վարչության, ինչպես նաև Հակահետախուզության գլխավոր վարչության աշխատակիցների, պետք է նշել, որ միջազգային պահանջներին համապատասխան կատարվող համալիր միջոցառումների արդյունքում համացանցային տիրույթում ոչ մի վնասակար գործողություն իր նպատակին չհասավ, իսկ ընթացիկ տարում խափանվեց ընդհանուր առմամբ մոտ 1 միլիոն հաքերային հարձակում, որից շուրջ 500 հազարը` Ցեղասպանության տարելիցին նվիրված միջոցառումների ժամանակահատվածում, կանխվեց պետական մարմինների համացանցային համակարգ վիրուսային, վնասաբեր ծրագրերի ներդրման մոտ 115 փորձ:
Այս տարի ևս պարզաբանվել են ադրբեջանական տարբեր կառույցների պատվերով այլ երկրների տարածքներից կատարված հարձակումները: Սակայն, դրանք նույնպես նպատակին չեն հասել, և անվտանգության մարմինների պաշտպանության տիրույթում գտնվող ոչ մի կայք չի կոտրվել, բացառվել է տեղեկատվության արտահոսքի հնարավորությունը:
Մենք հուսով ենք, որ անվտանգության հարցերով միջազգային կառույցներում ակտիվ ներգրավվածությունը այսուհետ ևս նպաստելու է տեղեկատվական տեխնոլոգիաների, անդրսահմանային և գլոբալ բնույթ կրող այլ հանցատեսակների դեմ արդյունավետ պայքարի մեր հնարավորությունների ընդլայնմանը:
Գործընկեր հատուկ ծառայությունների հետ համագործակցության օրակարգային ամենաարդիական հարցերից մեկն է մնում ահաբեկչական և ծայրահեղական տարաբնույթ դրսևորումների կանխարգելումն ու խափանումը:
Այդ համատեքստում պետք է գոհունակությամբ նշեմ, որ շարունակաբար կատարելագործվում, ամրապնդվում և բարեկարգվում է սահմանների պահպանության ընդհանուր համակարգը: Ինչպես և խոստացել էինք, ավարտին են մոտենում Բագրատաշեն, Բավրա և Գոգավան սահմանային անցման կետերի արդիականացման աշխատանքները: Այսպիսով` հայ-վրացական պետական սահմանին քաղաքացիների սպասարկումը համապատասխանեցվում է միջազգային ամենաբարձր պահանջներին:
Հետևողական բնույթ է կրում նաև Ծառայության նյութատեխնիկական բազայի զարգացումը և տեխնիկական հնարավորությունների ընդլայնումը: Ազգային անվտանգության մարմինների մի շարք ստորաբաժանումների կողմից օգտագործվող ժամանակակից տեխնիկական միջոցները թույլ են տալիս որակապես բարձրացնել օպերատիվ-հետախուզական գործունեության արդյունավետությունը:
Ամենայն վճռականությամբ հավաստիացնում եմ մեր հասարակությանն ու պետության ղեկավարությանը, որ Ազգային անվտանգության ծառայությունն ունակ և պատրաստ է դիմագրավել արտաքին և ներքին մարտահրավերներին: Հայաստանի քաղաքացիների, հասարակության ու պետության շահերին սպառնացող վտանգները կանխելու և խափանելու մեր հաստատակամությունն անբեկանելի է ու անսասան: Ազգային անվտանգության ծառայության ղեկավարությունն ու անձնակազմը ցանկացած պայմաններում շարունակելու են պետական մտածելակերպով առաջնորդվելու, բարձր պատասխանատվությամբ գործելու և սեփական գիտելիքներն ու հմտությունները մշտապես զարգացնելու աշխատաոճը: Դա հիմնական գրավականն է մեր հետագա հաջողությունների` անկախ նրանից, թե սրության ինչ աստիճանի կհասնի հակառակորդ հատուկ ծառայությունների հետ առճակատումը: Մենք շարունակելու ենք կոնկրետ գործերով ապացուցել անվտանգության մարմինների աշխատակիցների բարձր պրոֆեսիոնալիզմն ու հակառակորդի ոտնձգությունները կանխելու և խափանելու մեր վճռականությունը:
Հատուկ պետք է ընդգծել նաև, որ վերոնշյալ աշխատանքներն արդյունավետ իրականացնելու համար մենք ստանում ենք մեր քաղաքացիների գործուն աջակցությունը, որի համար շնորհակալ ենք:
Ցավոք, պետք է անդրադառնանք նաև մի մտահոգիչ երևույթի: Որոշ ընդդիմադիր գործիչներ, մեղադրողի դիրք ընդունելով, շարունակում են մեզ «ՆԿՎԴ» կամ «ԿԳԲ» անվանել, մոռանալով կամ գուցե ընդհանրապես անտեղյակ լինելով, որ Հայաստանի անվտանգության մարմինների պատմությունը սկիզբ է առնում դարերի խորքից, իսկ ժամանակակից դասական ընկալմամբ հետախուզական ու հակահետախուզական կառույցները մեր երկրում ձևավորվել են դեռևս Առաջին Հանրապետության օրոք` 1918 թվականի ամռանը: Եվ ընդամենը մի քանի տարի հետո մենք տոնելու ենք Հայաստանի անվտանգության մարմինների ձևավորման 100-ամյակը: Ինչ վերաբերում է Խորհրդային Հայաստանին, ապա ավելորդ չէ հիշել, թե Երկրորդ Հանրապետությունն ինչ պայմաններում ձևավորվեց, ինչ դաժան ճանապարհ անցավ, բայց ի վերջո նաև` ինչ ձեռքբերումներ ունեցավ: Իհարկե, երբևէ չպետք է մոռացության մատնել այն բռնաճնշումները, անիրավությունները, որ եղել են: Այդ թեմայով Հայաստանի անվտանգության մարմինների պատմության թանգարանում կան նյութեր, որոնցից երևում է նաև, թե հենց պետանվտանգության մարմինների քանի աշխատակից է զոհ գնացել կամ տուժել այդ կամայականություններից: Բայց չէ՞ որ դա հիմք չի տալիս մոռացության մատնել մեր անցյալը: Իսկ ինչ է, Առաջին Հանրապետության տարիներին չե՞ն եղել պրոբլեմներ: Կամ ներկայիս Երրորդ Հանրապետությունում ամեն ինչ իդեալակա՞ն է, չ՞կան հիմնախնդիրներ, թերություններ, բացթողումներ:
Զավեշտալին այն է, որ այսպես կոչված մեղադրողները մարդիկ են, ովքեր 20 տարի շարունակ ոչ մի տեղ չեն աշխատում և ընդդիմադիր պայքարն իրենց համար դարձրել են «փեշակ»: Ոմանք էլ նույնիսկ հանգանակություններ են կազմակերպում արտասահմանում` Հայաստանում իրենց ընդդիմադիր գործունեության ֆինանսավորումն ապահովելու համար:
Այնպես որ, տիկնայք և պարոնայք, մեկընդմիշտ հիշեք. առանց իմաստավորելու անցյալը` ապագան չի կարելի կերտել: Անցյալը մեզ հետ է, և դա մեզանից չես խլի: Մենք չենք կարող հրաժարվել նրանից: Միայն անխելք մարդը կարող է կարծել, որ հնարավոր է հրաժարվել պատմությունից: Բայց մենք պատրաստ ենք այսուհետ ևս շարժվել, մեր կարծիքով, ամենաճիշտ ճանապարհով` բոլոր քննադատողներին հանգիստ, համբերատար բացատրելով այս ամենը:
Այսօր մեր երախտագիտության խոսքը, շնորհավորանքն ու բարեմաղթանքներն ենք հղում մեր համակարգի վաստակաշատ վետերաններին, որոնց անգնահատելի փորձը, գիտելիքները, անսահման նվիրվածությունը ազգային անվտանգության ապահովման գործին մշտական ուղենիշ են լինելու աշխատակիցների աճող սերունդների համար: Միևնույն ժամանակ, ուշադրության կենտրոնում են մնում երիտասարդ աշխատակիցների դաստիարակության, նրանց մոտ պետական մտածելակերպի խորացման խնդիրները:
Պետության ղեկավարության մշտական հոգածության առարկա են նաև Ծառայության անձնակազմի սոցիալական երաշխիքների ապահովման, աշխատակիցների կենցաղային պայմանների բարելավման հարցերը: Աստիճանաբար ծավալվում է բնակարաններ գնելու նպատակով արտոնյալ պայմաններով վարկերի տրամադրման ծրագիրը:
Հարգելի գործընկերներ, հյուրեր, սիրելի վետերաններ:
Ամփոփելով խոսքս` կրկին ի սրտե շնորհավորում եմ Ձեզ մասնագիտական տոնի կապակցությամբ: Մաղթում եմ քաջառողջություն, ուժերի և կարողությունների բազմապատկում, անկոտրում կամք ու հաստատակամություն` մեր Հայրենիքի` Հայաստանի Հանրապետության ու հայ ժողովրդի անվտանգության ապահովման նվիրական գործում»:
ՀՀ Ազգային անվտանգության ծառայություն
