«Ամուսնության դեպքերը 2015 թվականին կազմել են 17 603 դեպք, դրանք նախորդ տարվա համեմատ նվազել են 6.9 տոկոսով»,- հունվարի 29-ին «Հայացք» մամուլի ակումբում լրագրողների հետ հանդիպման ընթացքում ասաց Հայաստանի ազգային վիճակագրական ծառայության մարդահամարի եւ ժողովրդագրության բաժնի պետ Կարինե Կույումջյանը:
Նա նշեց, որ ամուսնության ամենաբարձր ցուցանիշը գրանցվել է Վայոց ձորի մարզում, բարձր ցուցանիշներ են գրանցել նաեւ Կոտայքի մարզում եւ Երեւանում: Մնացած մարզերը միջին հանրապետականից ցածր ցուցանիշներ են գրանցել, իսկ ամենացածր ցուցանիշը գրանցել են Գեղարքունիքի, Սյունիքի եւ Տավուշի մարզերը: Կարինե Կույումջյանը նշեց, որ ամուսնությունների միջին տարիքի աճ է արձանագրվել՝ տղամարդկանց մոտ՝ 30.8 տարի, իսկ կանանցը՝ 28.3. «Առաջին անգամ ամուսնացողներինը մի քիչ ավելի ցածր է 29.4 տարի տղամարդունն է, 26.3-ը՝ կանանցը: Ընդ որում, եթե գյուղ-քաղաք տարբերակով ենք դիտարկում, ասեմ, որ քաղաքում մի քիչ ավելի բարձր է, քան գյուղում»:
Կարինե Կույումջյանը հայտնեց, որ 2015 թվականի ընթացքում արձանագրվել է նաեւ 3669 ամուսնալուծության դեպք. «Դրանք եւս նվազել են նախորդ ժամանակաշրջանի համեմատ, այսինքն՝ 2014 թվականի համեմատ, երբ ունեինք 4496 ամուսնալուծության դեպք: Նվազումը կազմել է 18.4 տոկոս: Ինչպես միշտ՝ ամուսնալուծության ամենաբարձր ցուցանիշն ունենք Լոռու մարզում, քիչ ավելի բարձր, քան միջին հանրապետականը ունենք Երեւանում, մնացած բոլոր մարզերում ամուսնալուծության գործակիցները ավելի ցածր են, քան հանրապետականը: Ընդ որում, ամենացածր ցուցանիշն ունեն Տավուշի եւ Գեղարքունիքի մարզերը»:
Նա նշեց, որ ամուսնալուծությունների մեծ մասը 20 տարի եւ ավելի համատեղ կյանքից հետո է գրանցվել, այնուհետեւ մեծ թիվ են կազմում 1-4 տարվա համատեղ կյանքից հետո գրանցված ամուսնալուծությունները:
Կարդացեք նաև
Ամի ՉԻՉԱԿՅԱՆ
