Փետրվարի 1-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Վրաստանի Հանրապետության Պաշտպանության նախարար Թինաթին Խիդաշելիի գլխավորած պատվիրակությանը` ուղեկցությամբ ՀՀ Պաշտպանության նախարարի առաջին տեղակալ Դավիթ Տոնոյանի և ՀՀ ԶՈՒ հոգևոր փոխառաջնորդ Հոգեշնորհ Տ. Մովսես աբեղա Սարգսյանի:
Հանդիպմանն Ամենայն Հայոց Կաթողիկոսը ողջունեց հարևան երկու երկրների Պաշտպանության նախարարությունների միջև ձևավորված սերտ կապերը` գոհունակությամբ փաստելով նաև պետական տարբեր մակարդակներում ձևավորված համագործակցությունը:
Նորին Սրբությունը, անդրադառնալով դարերի ընթացքում հայ և վրաց հավատակից ժողովուրդների` հավատքի ու ինքնության պահպանության խնդիրներին, ընդգծեց, որ նրանք, ունենալով միևնույն քրիստոնեական արժեհամակարգը, մշտապես զորակից ու սատար են եղել միմյանց:
Խոսելով Հայոց և Վրաց Եկեղեցիների հարաբերությունների մասին` Վեհափառ Հայրապետը հույս հայտնեց, որ վիրահայության հոգևոր կյանքում առկա խնդիրները երկու ժողովուրդների դարավոր բարեկամության ոգուն համահունչ կգտնեն իրենց անհրաժեշտ լուծումը:
Թինաթին Խիդաշելին, իր և ուղեկցող պատվիրակության անունից ընդունելության համար շնորհակալություն հայտնելով Ամենայն Հայոց Կաթողիկոսին, նշեց, որ քաջատեղյակ է հայ ժողովրդի կյանքում Հայ Եկեղեցու կողմից ստանձնած բացառիկ դերակատարությանը:
Զրույցի ընթացքում անդրադարձ եղավ տարածաշրջանում խաղաղության պահպանման հրամայականներին, ներկայացվեց Վրաց բանակում և ՀՀ ԶՈՒ հոգևոր սպասավորության կողմից իրականացվող հոգևոր ծառայության փորձառությունը:
Վերջում Նորին Սրբությունն առ Աստված աղոթք վերառաքեց, որպեսզի Տիրոջ բարի հայացքի ներքո հայ ու վրաց ժողովուրդները մշտապես ապրեն խաղաղ ու ստեղծագործ կյանքով:
Կարդացեք նաև
Հանդիպմանը ներկա էր Մայր Աթոռի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը:
Մայր Աթոռ Ս. Էջմիածին
