Դեռ տարեսկզբին, երբ ԱԺ նախագահ Գալուստ Սահակյանի ղեկավարած պատվիրակությունն այցելել էր ԼՂՀ, պայմանավորվածություններ էին ձեռք բերվել, որպեսզի ՀՀ եւ ԼՂՀ խորհրդարանների տարբեր հանձնաժողովներն ավելի սերտ համագործակցեն, համատեղ տարբեր նիստեր գումարեն: Այդ պայմանավորվածության շրջանակներում, ԼՂՀ-ում տեղի է ունեցել ՀՀ եւ ԼՂՀ խորհրդարանների արտաքին հարաբերությունների եւ պաշտպանության, ազգային անվտանգության հարցերի հանձնաժողովների համատեղ քննարկում:
«Շատ անկաշկանդ եւ բաց քննարկում էր, որտեղ ներկայացվեցին բոլոր մտավախություններն ու խնդիրները`հասկանալու եւ քննարկելու համար`ինչպե՞ս է հնարավոր համատեղել երկու հայկական պետությունների գործողություններն ու պայքարը`խորհրդարանական դիվանագիտության ոլորտում»,- Aravot.am-ի հետ զրույցում քննարկման մասին պատմեց ՀՀ ԱԺ պատգամավոր Թեւան Պողոսյանը:
Շատ է խոսվել պաշտպանական ոլորտի խնդիրներից, Արցախի եւ ՀՀ-ի պատգամավորները համատեղ այցեր են կատարել տարբեր շրջաններ: Թեւան Պողոսյանն, որը եղել է առաջնագծում, փաստում է, որ ՀՀ ԱԺ պաշտպանության, ազգային անվտանգության հարցերի հանձնաժողովի անդամներն, իր պատգամավորության չորս տարիների ընթացքում քանիցս են եղել առաջնագծում, տեղում ծանոթացել խնդիրներին:
«Շատ կարեւոր էր նաեւ այս անգամվա այցելությունը, որպեսզի սեփական աչքերով տեսնել խնդիրները, հասկանալ`ինչպե՞ս դրանք պետք է բարձրացնել եւ քննարկել: Խոսել ենք առաջնագծում զինվորների, կամավորների, զորամասերում, բնակիչների հետ եւ այն ամեն տեղեկությունը, որը հավաքել ենք, անպայման կդառնան շատ խնդիրների նկատմամբ մոտեցումների վերանայման հիմք: Քայլ առ քայլ եւ հետեւողական կփորձենք առաջ տանել»,- ասաց մեր զրուցակիցը:
Կարդացեք նաև
Հետաքրքրվեցինք եւ խնդրեցինք մի փոքր մանրամասնել`հատկապես ի՞նչ խնդիրներ կան, դրանց համար ի՞նչ լուծումներ են տեսնում: Թեւան Պողոսյանը ձեռնպահ մնաց դրանք բարձրաձայնել: Ասաց. «Մենք կարծես քայլ առ քայլ անցնում ենք նրան, որ բաց ու անկաշկանդ ոչ միայն դրականն ենք քննարկել, այլ նաեւ սուր հարցերը: Բայց այդ խնդիրների բաց կամ փակ լինելու հարցերում պետք է տարբերակենք`որո՞նք են, այսպես ասած, մեր տնային աշխատանքները, որոնք, կատարելուց հետո միջազգային ատյաններում պիտի ներկայացնենք: Ավելի ճիշտ կլինի այժմ հետեւողական լինենք այդ խնդիրների լուծմանը, քան թե ներքին հարցերը բարձրաձայնենք: Պատերազմը դեռ չի ավարտվել, մենք պատերազմի մեջ ենք գտնվում, պետք է ապրենք պատերազմական հոգեբանությամբ, իսկ պատերազմական իրավիճակն այլ կանոններ է ունենում»:
Հարցին`այն խնդիրներին, որոնք ի հայտ եկան ապրիլյան քառօրյա պատերազմի ժամանակ, մեկ ամիս անց լուծումներ կա՞ն: «Չէի ցանկանա ասել ոչ այո, ոչ էլ`ոչ: Կան հարցեր, որոնց լուծումներն ինչ-որ չափով դրված են: Կան հարցեր, որոնք, ես համարում եմ, որ ինչ-որ չափով ուշացնում ենք: Եթե կան խնդիրներ, որոնք եթե գիտակցում ես, որ հասկացել ես, ապա շատ արագ դրանց լուծումներին պետք է անցնել: Հուսով եմ, որ ինչպես պայմանավորվել ենք`հետեւողական աշխատել, կպահենք»,- ասաց պատգամավորը:
Այսօր մայիսյան եռատոնի առիթով, այցելություն է եղել նաեւ եղբայրական գերեզմանոց, ծաղիկներ են դրվել Մեծ հայրենականում զոհվածների հիշատակի համար, փոքրիկ զինվորական շքերթ է եղել, այնուհետ ծաղիկներ են դրվել 1991-94 թվականներին արցախյան պատերազմում զոհվածների շիրիմներին, ապա հերոսական տանկի հուշարձանին եւ Շուշիի Սբ. Ղազանչեցոց եկեղեցում մասնակցել են պատարագի:
«Ապա ամենքն անցավ իր գործին, քանի որ իրավիճակն այնպիսին է, որ մեր բանակը շատ զգոն պետք է պաշտպանի սահմանները, պետական մարմինները պետք է կարողանան իրենց աշխատանքներն ուղղորդել անվտանգության խնդիրների պահպանմանը: Ուրախ եմ, որ մարդկանց աչքերում կրակ կար, բոլորն իրար շնորհավորում էին եւ սա, երեւի ամենակարեւոր դասն է`Արցախում որեւէ ընկճվածություն չկա: Հակառակը, հաղթանակի ոգին բարձր է: Շնորհավորում եմ Արցախի եռատոնը, Հայաստան`քո տոնը»,- եզրափակեց մեր զրուցակիցը:
Նելլի ԳՐԻԳՈՐՅԱՆ
