ԱԺ-ում քննարկվում է «Պետգույքի մասնավորեցման 2006-2007-ի ծրագրերի կատարման 2014-ի տարեկան հաշվետվությունը» հաստատելու մասին հարցը:
ՀԱԿ խմբակցության ղեկավար Լեւոն Զուրաբյանը դժգոհեց, որ մեղադրանքներ են իրենց հասցեին հնչում՝ 90-ականների մասնավորեցման գործընթացի առնչությամբ: Նրա դիտարկմամբ՝ «Որպես այդ տարիների կոալիցիոն գործընկեր՝ դուք՝ ՀՀԿ-ն, պատասխանատվություն է կրել այդ գործընթացի իրականացման համար, բայց 1999-ից ի վեր ՀՀ-ում բոլոր վարչապետները եղել է ՀՀԿ-ական, իսկ մենք եղել ենք այլեւս միայն ընդդիմություն: Որեւէ դժվարություն չկա մասնավրեցման գործընթացները այդ ժամանակաշրջաններում համեմատելու համար»:
Նա մեջբերեց առաջին նախագահ Լեւոն Տեր-Պետրոսյանի՝ 2007-ի դեկտեմբերի 8-ի հանրահավաքի ելույթից, որտեղ նա արել է մանրամասն համեմատություն:
Կարդացեք նաև
«Արդ, ի՞նչ է սեփականաշնորհվել նախկին իշխանությունների օրոք. Գյուղատնտեսական նշանակության ողջ հողատարածքը, անասնագլխաքանակը եւ գյուղտեխնիկան, բացի հողի 20%-ը կազմող պետական պահուստից, որը նախատեսված էր աճող եւ նոր ձեւավորվող ընտանիքների համար։ Ողջ պետական բնակարանային ֆոնդը, որը անվճար տրամադրվեց քաղաքներում եւ ավաններում գրանցված բոլոր ընտանիքներին։ Հանրապետության բոլոր ոչ ստրատեգիական ձեռնարկությունների սեփականության 20 տոկոսը, որը անհատույց շնորհվեց այդ ձեռնարկությունների կոլեկտիվներին։ Սեփականաշնորհման 1994-1995 թթ. առաջին ծրագրում ընդգրկված ձեռնարկությունների 60 միլիարդ դրամի ընդհանուր արժողությամբ գույքը, որը 20-հազարական դրամի վաուչերներով հավասարաչափ բաշխվեց ողջ բնակչությանը։ Շուրջ 5000 փոքր ձեռնարկություններ՝ կրպակներ, խանութներ, վարսավիրանոցներ, արհեստանոցներ եւ այլն, որոնք վաճառվեցին քաղաքացիներին՝ կոլեկտիվների համար վերապահված գնման առաջնահերթության իրավունքով։ Սննդի ու թեթեւ արդյունաբերության մոտ 1250 միջին եւ խոշոր ձեռնարկություններ (առ 1.01.1998), որոնք թեեւ թվով կազմում էին Հայաստանի այդ մասշտաբի ձեռնարկությունների 60 տոկոսը, բայց արտադրական ծավալով՝ միայն շուրջ 40 տոկոսը, այն էլ՝ չընդգրկելով ստրատեգիական նշանակության ոչ մի ձեռնարկություն, բացառությամբ Հայռուսգազարդի գործարքի, որի մասին կխոսվի ստորեւ»:
Առաջին նախագահն այդ ժամանակ խոսել է իրենց իրականացրած հողի սեփականաշնորհման կամ ագրարային ռեֆորմից՝ ասելով, որ Հայաստանը իրականում ցրտից ու մթից բացի անխուսափելիորեն կմատնվեր նաեւ սովի, եթե դա չարվեր. «Իսկ թե ի՞նչ է սեփականաշնորհվել ներկա իշխանությունների օրոք. Ծանր արդյունաբերության շուրջ 750 միջին եւ խոշոր ձեռնարկություններ, ստրատեգիական նշանակության համարյա բոլոր ձեռնարկությունները, ինչպես, օրինակ, հիդրոէլեկտրակայանները, էներգետիկ ցանցը, Զանգեզուրի պղնձա-մոլիբդենային կոմբինատը, քաղաքացիական ավիացիան, ԱրմենՏելը, Կոնյակի գործարանը եւ այլն։ Հայաստանի համարյա բոլոր շահագործվող եւ նույնիսկ միայն հետազոտված հանքերը, որոնք չնչին գներով վաճառվել են հիմնականում երկրի բարձրաստիճան պաշտոնյաներին, իսկ մասամբ օտարերկրյա սեփականատերերի։ Հանրապետության գյուղատնտեսական նշանակության հողատարածքի 20 տոկոսը կազմող պետական պահուստը, որը նույնպես սիմվոլիկ գնով բաշխվել է պետական պաշտոնյաների միջեւ։ Հանրապետության հանգստի գոտիների, մասնավորապես, Ծաղկաձորի, Սեւանի ավազանի, Դիլիջանի, Հանքավանի, Աղվերանի անտառներն ու անտառտնտեսությանը պատկանող գույքն ու շինությունները եւ այլն։ Այս ամենին պետք է գումարել նաեւ «Գույք պարտքի դիմաց» հայտնի գործարքը, որով Հայաստանը Ռուսաստանին հանձնեց «Մարս» արտադրական միավորումը, «Մերգելյան» ինստիտուտն ու գործարանը, Հրազդանի ՋԷԿ-ի անավարտ բլոկը եւ Նյութաբանության գիտաարտադրական ձեռնարկությունը՝ հետագայում, այլ դրդապատճառներով դրանց թվում ընդգրկելով նաեւ Սեւան-Հրազդան կասկադը եւ Արմավիրի ատոմակայանի ֆինանսական կառավարման իրավունքը։ 100 միլիոն դոլարի պարտքը այն գումարը չէր, որի վճարման հարցը հնարավոր չլիներ լուծել Ռուսաստանի հետ։ Տվյալ գործարքում Ռուսաստանը որեւէ մեղք չունի, եւ միանգամայն անտեղի են նրա հասցեին հնչող տարբեր տիպի դժգոհությունները»:
Լեւոն Զուրաբյանի խոսքերով՝ այս համեմատությունը լավագույն պատասխանն է ձեր մեղադրանքներին:
Պատմական փաստերի մասին, երբ որ խոսք գնաց՝ հատկապես 100 մլն դոլարի հետ կապված, Հրանտ Բագրատյանը տեղից արձագանքեց՝ որոշ մանրամասներ ներկայացնելով, թե ինչ է արել Ռոբերտ Քոչարյանը: Շարմազանովը հորդորեց երկրորդ նախագահի մասին չխոսել՝ «Ստեղ չի, իր մասին մի խոսեք, ո՞ւր կանչեմ, պատգամավոր չի»:
Միքայել Մելքումյանն էլ փակեց վեճը՝ ասելով, որ այսօր ոչ ոք ռեւիզիայի չի ենթարկում մասնավորեցումը:
Հռիփսիմե ՋԵԲԵՋՅԱՆ