ԱԺ պատգամավոր Թեւան Պողոսյանն էլ է այն կարծիքին, ԼՂ հարցում դիվանագիտական գործընթացը ինչ-որ չափով փակուղի է մտել:
«Վիեննայում ձեռք բերված պայմանավորվածությունները կյանքի չեն կոչվում: Արցախում այսօր Արցախի սեփական ուժերով են ամրապնդում առաջնագիծը, որը այլեւս թույլ չի տա ապրիլյան էսկալյացիայի այն բացերը, որոնք ունեցել ենք, նորից կրկնվեն: Ամեն ինչ արվում է, որ ապագայում բոլոր կորուստները վերականգնվեն»,- «Բլից ինֆո» ակումբում ասաց պատգամավորը:
Ըստ նրա, մինչեւ Արցախը բանակցային սեղանի շուրջ չնստի, հիմնախնդրի լուծում հնարավոր չէ. «Խնդրի լուծում տեղի չի ունենալու: Կարող են բանակցել տարբեր մտավարժանքներից փաստաթղթեր, որոնք կգան ու կգնան, բայց ամեն ինչ որոշվելու է այն դեպքում, երբ հենց Արցախը նստած լինի բանակցությունների շուրջ»:
Պատգամավորի կարծիքով, պետք է գիտակցել, որ ունենք թշնամի, որն ունի մի երազանք. «Ռազմական ուժով լուծել Արցախի հարցը: Պետք է պատրաստ լինենք այդ սցենարի զարգացմանը»:
Կարդացեք նաև
Հողերի հանձման մասին լուրերին անդրադառնալով՝ պարոն Պողոսյանն ասաց, որ Արցախից է վերջերս վերադարձել, որտեղ առաջնագծով անցել է մի քանի անգամ ու համոզվել՝ զինվորները, արցախցիները ոչ միայն հողեր չհանձնելու մտադրություն չունեն, այլեւ մարդիկ ամեն օր մտածում են եղած կորուստը ինչպես վերականգնել:
«Արցախի խնդիրը սերունդների խնդիր է, երեք չորս սերունդ դեռ գնալու է այս խնդիրը, կմոտենանք ընկալումներին, որ թշնամու հետ հնարավոր է ինչ-որ բան պայմանավորվել, երբ Ադրբեջանի բոլոր պատմության գրքերը աղբաման նետվեն, ու նոր դասագրքեր գրվեն»,- ասաց պատգամավորը:
Արփինե ՍԻՄՈՆՅԱՆ
