Հայաստանին օլիմպիական, աշխարհի ու Եվրոպայի չեմպիոններ տված Գյումրին ճանաչվել է այս տարվա լավագույն մարզական համայնք: Սա արդեն երկրորդ անգամն է, որ հանրապետության երկրորդ քաղաքն արժանանում է նույն կոչմանը: Փաստենք միայն, որ այս տարի գյումրեցի 101 մարզիկներ մասնակցել են աշխարհի, Եվրոպայի առաջնություններին և Օլիմպիական խաղերին, որոնցից 52-ը նվաճել են մեդալներ՝ 9 ոսկի, 22 արծաթ և 21 բրոնզ: Իսկ հունահռոմեական ոճի ըմբիշ Արթուր Ալեքսանյանը 20 տարի անց Հայաստան բերեց օլիմպիական ոսկի, ծանրորդ Գոռ Մինասյանն էլ դարձավ արծաթե մեդալակիր: Նման չտեսնված արդյունքների համար Գյուրին արժանացել է ՀՀ նախագահ Սերժ Սարգսյանի՝ 1 մլն 500 հազար դրամ պարգևին:
Այսօր Գյումրու քաղաքապետարանում որոշվեց այդ գումարով մարզադպրոցների համար ձեռք բերել մարզական գույք, պարագաներ ու համակարգիչներ: Մեր հարցին, թե դա բավարա՞ր է մարզադպրոցները կահավորելուն, երբ Հայաստանի հիմնը աշխարհով մեկ հնչեցնող ու Հայոց եռագույնը ծածանող գյումրեցի մարզիկները պարապում են անմխիթար պայմաններում, օրինակ՝ Արթուր Ալեքսանյանի մարզադպրոցում ոտք դնողը վայր է ընկնում, պատերը ներս մտնողի վրա են թափվում, Գյումրու քաղաքապետարանի սպորտի բաժնի պետ Մեխակ Ղազարյան պատասխանեց, որ պարգևատրել են պետության հնարավորությունների սահմանում:
Մեխակ Ղազարյանը նաև տեղեկացրեց, որ Սամվել Կարապետյանն ու Գագիկ Ծառուկյանը ցանկություն են հայտնել իրենց միջոցներով վերանորոգել Արթուր Ալեքսանյանի անվան մարզադպրոցը, չթողնել բյուջեի վրա: Քաղաքապետարանի պաշտոնյան նաև ասաց, որ հագեցած, գույքով ապահոված մարզադպրոցներ ունենալու դեպքում գյումրեցիները էլ ավելի լուրջ արդյունքներ կցուցաբերեն և ոչ միան հենակետային մարզաձևերում:
Մանրամասները տեսանյութում՝
Նունե ԱՐԵՎՇԱՏՅԱՆ
