«Դատարանը երկար ու մանրակրկիտ քննեց միջնորդությունը, թեև ակնկալիք ունեինք, որ այն ակնհայտ ապօրինի է և որևէ իրավական քննադատության չի կարող դիմանալ։ Սակայն դատարանն անհասկանալիորեն որոշեց բավարարել այն՝ մեկ ամիս ժամկետով»,- այսօր լրագրողների հետ զրույցում ասաց «Ուժեղ Հայաստան» կուսակցության առաջնորդ Սամվել Կարապետյանի պաշտպան Արմեն Ֆերոյանը՝ անդրադառնալով երեկ Կարապետյանի տանն ու նրան փոխկապակցված ընկերություններում իրականացված խուզարկություններից հետո վարույթն իրականացնող մարմնի՝ դատարան ներկայացրած միջնորդությանը։
Հիշեցնենք, որ վարույթն իրականացնող մարմինը միջնորդել էր երկու ամսով կալանք կիրառել։ Նշենք նաև, որ Սամվել Կարապետյանը գտնվում էր տնային կալանքի մեջ։
Ֆերոյանը այս գործընթացը ևս համարում է քաղաքական հետապնդման շղթայի մաս։
Կարդացեք նաև
«Մենք գտնում ենք, որ սա ապօրինի և անհիմն որոշում է, և անպայման բողոքարկելու ենք։ Այն միանշանակ քաղաքական դրդապատճառներ է պարունակում, և որևէ անաչառ դիտորդ չի կարող ուսումնասիրել այս գործն ու չտեսնել այդ դրդապատճառները»,- նշել է պաշտպանը։
Արփինե ՍԻՄՈՆՅԱՆ
