Հունվարի 12-ին հրապարակվել է ԵԱՀԿ/ԺՀՄԻԳ կարիքների գնահատման առաքելության զեկույցը:
Հիշեցնենք, որ ԵԱՀԿ/ԺՀՄԻԳ-ը ՀՀ իշխանություններին խորհուրդ է տալիս ապրիլին կայանալիք խորհրդարանական ընտրությունները հետեւելու համար Հայաստան դիտորդական առաքելություն ուղարկել, ինչի համար անհրաժեշտ է ՀՀ իշխանությունների հրավերը:
ԵԱՀԿ/ԺՀՄԻԳ կարիքների գնահատման առաքելության զեկույցում գրված է՝ «Կարեւոր է, որ ընտրական բարեփոխումն իրականացվել է լայնամասշտաբ հանրային քննարկումների եւ լայնածավալ քաղաքական աջակցության արդյունքում: ԵԱՀԿ/ԺՀՄԻԳ ԿԳԱ շատ զրուցակիցներ մեծապես ողջունել են օրենսդրական փոփոխությունները՝ քաղաքական ուժերի միջեւ հանրային քննարկումներն ու համագործակցության մթնոլորտը համարելով դրական քայլ՝ ուղղված նախքան ընտրությունները հանրային վստահության մթնոլորտ ձեւավորելուն»:
«Նոր օրենսգրքում հաշվի են առնվել ԵԱՀԿ/ԺՀՄԻԳ-ի կողմից նախկինում ներկայացված մի շարք առաջարկություններ»,- գրված է զեկույցում, եւ այդ առաջարկություններից որոշները վերաբերում էին ընտրողների ցուցակներին եւ նույնականացմանը, կանանց՝ որպես թեկնածուների ներկայացվածությանը, բողոքներին եւ դիմումներին, ինչպես նաեւ քարոզչությանը եւ նախընտրական քարոզչության ֆինանսավորմանը»:
Կարդացեք նաև
Ըստ զեկույցի, ընտրողների գրանցումը պասիվ է, ոստիկանությունը վարում է ընտրողների համազգային էլեկտրոնային գրանցամատյան: ԵԱՀԿ/ԺՀՄԻԳ ԿԳԱ զրուցակիցներից որեւէ մեկը մտահոգություն չի հայտնել ընտրողների ցուցակների ճշգրտության առնչությամբ: Ընտրության օրն առաջին անգամ բոլոր ընտրողների մատնահետքերը եւ նույնականացման քարտերը կսկանավորվեն եւ կպահվեն էլեկտրոնային եղանակով՝ որպես հնարավոր բազմակի քվեարկությունը կանխելու միջոց:
Զեկույցում տեղ գտած դրական արձանագրություններից է այն, որ Ընտրական օրենսգրքով նախատեսվում է ընտրություններից հետո հրապարակել ընտրողների ստորագրված ցուցակները՝ արտերկրում գտնվող ընտրողների փոխարեն մեկ այլ անձի կողմից քվեարկելու հնարավոր դեպքերի առնչությամբ ընդդիմության եւ քաղաքացիական հասարակության կողմից բազմիցս հնչեցված մտահոգությունները վերացնելու նպատակով: Սա, ըստ ԵԱՀԿ/ԺՀՄԻԳ ԿԳԱ զրուցակիցների, վստահության մթնոլորտ ձեւավորող միջոց եւ հնարավոր խարդախությունը կանխելու գործիք է:
Իսկ ընտրական վեճերը լուծելու համար սահմանված նոր ժամկետներն, ըստ զեկույցի, ողջամիտ են: Իսկ ԵԱՀԿ/ԺՀՄԻԳ նախկին առաջարկություններին
Արձագանքելով, քաղաքացի-տեղական դիտորդների համար պարտադիր վերապատրաստման դասընթացներ կազմակերպելու եւ ստուգարք անցկացնելու մասին դրույթը հանվել է:
Իրավական դաշտի վերաբերյալ ԵԱՀԿ/ԺՀՄԻԳ-ի դիտարկումներն են՝ բարեփոխման գործընթացը եղել է բաց եւ համապարփակ, փոփոխությունները հավանության են արժանացել իշխող եւ ընդդիմադիր պատգամավորների ճնշող մեծամասնության կողմից: Նոր օրենսգրքով նախատեսվում է ընտրողների նույնականացման կատարելագործված համակարգ, ընտրողների ստորագրված ցուցակների հրապարակում, ընտրական մարմինների անկախությունը խթանող միջոցներ, դիտորդների համար պարտադիր ստուգարքի վերացում եւ թեկնածուների ցուցակում կանանց քվոտաների բարձրացում: Փոփոխություններով նաեւ հստակեցվում են նախընտրական քարոզարշավին, նախընտրական քարոզարշավի ֆինանսավորմանը, թեկնածուների գրանցմանը եւ բողոքներին ու դիմումներին վերաբերող առանցքային դրույթները:
ԵԱՀԿ/ԺՀՄԻԳ ԿԳԱ զրուցակիցների մեծ մասը ողջունել է օրենսդրական փոփոխությունները՝ քաղաքական ուժերի միջեւ հանրային քննարկումներն ու համագործակցության մթնոլորտը համարելով դրական քայլ:
Զեկույցի դիտարկումներից են՝ «Սեպտեմբերի 13-ին իշխող եւ ընդդիմադիր կուսակցությունները ստորագրել են քաղաքական համաձայնագիր ժողովրդավարական ընտրություններ անցկացնելու պայմանները բարելավելու համար հետագա միջոցառումների մասին: Քաղաքացիական հասարակության կազմակերպությունները նույնպես ներգրավվել են այս բանակցություններում, թեեւ նրանք չեն ստորագրել վերջնական համաձայնագիրը, քանի որ իրենց՝ որպես քաղաքացի դիտորդների համար նախատեսված սահմանափակումները նվազեցնելու կոչերը հաշվի չեն առնվել»:
Պատրաստեց՝ Նելլի ԲԱԲԱՅԱՆԸ
