Նոյեմբերյանի ջրօգտագործողների ընկերության աշխատողները չեն ստացել 4-5 ամսվա աշխատավարձերը: «Նոյեմբերյանի ջուր օգտագործողների ընկերություն» հասարակական կազմակերպության նախագահ Գագիկ Վերանյանը հայտնեց, որ իրենց ընկերության աշխատավարձերը գոյանում են երկու աղբյուրից՝ մատակարարված ոռոգման ջրի դիմաց գյուղացիական տնտեսություններից հավաքագրված վարձավճարներից եւ պետական բյուջեից հատկացվող սուբսիդիաներից: Նոյեմբերյանի ՋՕԸ-ի աշխատողները մատակարարած ոռոգման ջրի վարձավճարներն ամբողջությամբ հավաքագրել են: Սակայն պետական բյուջեից հատկացվող սուբսիդիան չի հատկացվել: Գ. Վերանյանն ասաց, որ իրենց ընկերությունը ստացել է 2016թվականի հունվարից ապրիլ ամիսների համար նախատեսված սուբսիդիայի գումարները, դրանից հետո բյուջեից ֆինանսական հատկացում չի արվել: Ընկերության տասնյակ աշխատողներ սպասում են պետական բյուջեից գումարների փոխանցմանը, որպեսզի աշխատավարձ ստանան:
Նոյեմբերյանի ՋՕԸ-ն ոռոգման սեզոնում ունենում է շուրջ 130 աշխատող: Հիմա՝ ձմռան ընթացքում, երբ ջրբաշխները,ոռոգման պոմպավարները չեն աշխատում, ընկերության աշխատողների թիվը մոտ 50 է: Գ. Վերանյանը հայտնեց, որ կառուցվածքային փոփոխություն է ընթանում, Նոյեմբերյանի, Իջեւանի, Բերդի ՋՕԸ-երը միավորվում են, ստեղծվում է «Տավուշ ՋՕԸ», որի գրասենյակը լինելու է Տավուշի մարզկենտրոն Իջեւանում:
Ոսկան ՍԱՐԳՍՅԱՆ
Կարդացեք նաև
