Մի քանի օրից դպրոցներում կհնչի վերջին զանգը: Գաղտնիք չէ, որ վերջին զանգի, ավարտական քննությունների ու կազմակերպվող խնջույքներին, ավարտական դասարաններում սովորող երեխաներ ունեցող ընտանիքներում պատրաստվում են դեռ ամիսներ առաջ, հավաքելով որոշակի գումարներ: Թեեւ յուրաքանչյուր ուսումնական տարվա վերջին զգուշացվում են, որ դպրոցներում դրամահավաքություն չի թույլատրվում, սակայն առանց այդ գումարների տոնը նշել, կարծես թե, չի ստացվում:
Aravot.am-ի հետ զրույցում ՀՀ կրթության եւ գիտության նախարար Լեւոն Մկրտչյանն ասաց, որ նախարարության թեժ գիծը ստանում է բազմաթիվ ահազանգեր՝ կապված դրամահավաքության հետ. «Հնարավորինս արգելում ենք: Երեխաների հավաքվելու, նշելու հարցը չպետք է դառնա մեծ գումարներ հավաքելու ձեւ»:
Նախարարն ասում է, որ շատ հաճախ դպրոցներում գումարներ չեն հավաքում, սակայն դրանք հավաքվում են դպրոցի սահմաններից դուրս՝ ծնողական կոմիտեի նախաձեռնությամբ:
«Լոռու մարզից էլ ենք դրամահավաքության հետ կապված ահազանգեր ստացել ենք, բայց նույնքան էլ ահազանգեր ենք ստանում, որ ինչու՞ չեք թողնում մեր երեխաները նորմալ իրենց տոնը նշեն: Նույնիսկ կոլեկտիվներ են եկել մեզ մոտ, որ դուք ո՞վ եք, որ թույլ չեք տալիս մեր երեխաները մի տեղ նշեն իրենց վերջին զանգը»:
Մանրամասները՝ տեսանյութում
Տաթեւիկ ՂԱԶԱՐՅԱՆ
