Գյումրու ավագանու «Քաղաքացիական պայմանագիր» խմբակցության ղեկավար, «ՀԷՑ» ՓԲԸ-ի Շիրակի մարզի «Ղարս» մասնաճյուղի ղեկավար Սարիկ Մինասյանի՝ Ազգային ժողովի պատգամավոր ընտրվելուց հետո «ՀԷՑ» ՓԲԸ-ի ժամանակավոր կառավարիչ Ռոմանոս Պետրոսյանը օրերս նոր նշանակում է կատարել «Ղարս» մասնաճյուղի տնօրենի պաշտոնում։
Այն ստանձնել է Դավիթ Սարգսյանը, որը Շիրակի մարզ աշխատանքի է եկել մայրաքաղաքից։
Դավիթ Սարգսյանը եղել է ոստիկանության համակարգից․ այս ոլորտում երկարատև օպերատիվ ծառայության փորձ ունի։
Կարդացեք նաև
Ոստիկանական համակարգից բացի նա բարձր պաշտոն է զբաղեցրել նաև փրկարար ծառայությունում․ ներքին գործերի նախարար Վահե Ղազարյանի պաշտոնավարման օրոք՝ 2023 թվականի մարտից զբաղեցրել է փրկարար ծառայության տնօրենի տեղակալի պաշտոնը։ Նրան շնորհվել է նաև «փրկարարական ծառայության գնդապետի» կոչում։
Էլցանցի անձնակազմից մեզ փոխանցեցին, որ նա այս համակարգ է մտել Ռոմանոս Պետրոսյանի պաշտոնավարման ժամանակաշրջանից, նախկինում այս համակարգի հետ որևէ առնչություն չի ունեցել։
Այսօր նորանշանակ պաշտոնյան հյուրընկալվել է Շիրակի մարզպետ Դավիթ Առուշանյանին։
Ինչպես տեղեկանում ենք Շիրակի մարզպետի աշխատակազմի պաշտոնական կայքից, քննարկել են Շիրակի մարզում, մասնավորապես՝ Գյումրիում իրականացվող փողոցաշինական աշխատանքներին առնչվող հարցերը, որոնք կապված են «ՀԷՑ»-ի աշխատանքների հետ։
Պաշտոնական տեղեկատվության համաձայն․ «Հանդիպման ընթացքում կարևորվել է «ՀԷՑ»-ի և մարզպետի աշխատակազմի միջև շարունակական ու արդյունավետ համագործակցությունը՝ շինարարական աշխատանքների անխոչընդոտ ընթացքն ապահովելու նպատակով։
Առկա խնդիրների արագ վերացման և հետագա աշխատանքների արդյունավետ համակարգման նպատակով կստեղծվի աշխատանքային խումբ՝ մարզպետի աշխատակազմի պատասխանատուների և «ՀԷՑ»-ի աշխատակիցների ներգրավմամբ»։
Նկատենք, որ վերջին շրջանում Գյումրիում շատ հաճախակի են հոսանքազրկումները․ երբեմն ողջ Գյումրին՝ իր բոլոր թաղերով, անսպասելիորեն հայտնվում է խավարի մեջ, ու բնակիչներին որևէ հնարավորություն չի ընձեռվում կապ հաստատելու ու պատճառների մասին տեղեկանալու։
Այս մասին փաստում են նաև Ռոմանոս Պետրոսյանին ուղղված ֆեյսբուքյան գրառումները։
Նունե ԱՐԵՎՇԱՏՅԱՆ
