ԳԱԱ Հնագիտության և Ազգագրության ինստիտուտում այսօր ներկայացվեց Խորհրդային Հայաստանից 1949 թ. աքսորված քաղաքացիների տվյալների առաջին էլեկտրոնային շտեմարանը, որը ներառում է 1949թ. այս օրն աքսորված մոտ 13.000 անձի ճակատագրի մասին տեղեկություններ: Շտեմարանի ստեղծումը հնարավոր է դարձել Armenia Total(itar)is ծրագրի շրջանակներում, որի համանուն կայքում էլ կարելի է տվյալներ որոնել:
Լյովա Աթարյանն ութ ամսական էր, երբ նրան ու ծնողներին աքսորեցին Ալթայի երկրամաս: Aravot.am-ին Լյովա պապը պատմեց, որ աքսորի պատճառը Սիրիայից եկած հոր՝ դաշնակ լինելն էր:
«Մայրս կոմունիստ էր, նա ինքնակամ գնաց հորս հետ: Ալթայում ճակնդեղի դաշտերում էին աշխատում: Այդտեղ մնացինք մինչեւ Ստալինի մահը, ինչից հետո վերադարձանք Արթիկ…Պապս մահացավ Ալթայում»,-հիշեց նա:
Հավելենք, որ շտեմարանի ստեղծման գործում նշանակալի ավանդ ունեն հատուկ այդ նպատակով վերապատրաստված մի խումբ ուսանողներ, որոնք ուսումնասիրել են ՀՀ ազգային արխիվի տրամադրած՝ աքսորված քաղաքացիների մասին փաստաթղթերը: Ընդհանուր առմամբ, ՀԽՍՀ-ից աքսորվածների թիվը մոտ 50 հազար է:
Լուիզա ՍՈՒՔԻԱՍՅԱՆ
