Այսօր ԱԺ արտահերթ նիստում քննարկվում է Սեւանա լճից լրացուցիչ 100 մլն 3 ջուր բաց թողնելու նախագիծը: Ջրտնտպետկոմի նախագահ Արսեն Հարությունյանը նախագիծը ներկայացնելիս ասաց, որ ջրառն անհրաժեշտություն է: Լրացուցիչ ջրառի նկատմամբ կառավարությունը խոստանում է իրականացնել համապարփակ կառավարում, լուծել գյուղատնտեսական խնդիրը, կառավարել լրացուցիչ ջրառի արդյունքում էլեկտրաէներգիայի համար լրացուցիչ ֆինանսական միջոցները:
«Ծառուկյան» դաշինքի պատգամավոր Նաիրա Զոհրաբյանի դիտարկմամբ՝ բնակպահպանները վստահ են, որ սա չի լուծում ձեր ներկայացրած խնդիրը՝ գյուղացիական տնտեսությունները ոռոգման ջրով ապահովելու: Ըստ նրա «այստեղից-այնտեղից կպցրած» հիմնավորումներով է կառավարությունը եկել: Հասկանալի չի բնապահպանության նախարարության ոչ միանշանակ դիրքորոշումը այս նախագծին, որը հարցեր է առաջացնում այս նախագծի այլ նպատակների մասին:
ՀՀԿ պատգամավոր Մարգարիտ Եսայանն էլ հիշեցրեց, որ սա նոր չէ, Սեւանա լճից ջուր բաց թողնելը շարունակական է դարձել: Նա հարցրեց՝ մենք սովոր ենք, որ թղթի վրա գրված բաները պետք է ոչ միշտ համապատասխանեն իրականությանը, բայց հաշվետվությունները ո՞վ պետք է ստուգի՝ արդյոք ինչքա՞ն ջուր են բաց թողնում իրականում: Արսեն Հարությունյանը պատասխանեց, որ սպառված ջրի քանակների մասին ԳԱԱ Սեւանա լճի պահպանության փորձագիտական հանձնաժողովին եւ բնապահպանության նախարարությանն են ներկայացնելու:
Մարգարիտ Եսայանը արձագանքեց՝ թիվ ներկայացնելը մի բան է, ստուգելը մեկ այլ բան է: Արսեն Հարությունյանը պատասխանեց, որ ստուգող մարմինը Վերահսկիչ պալատն է, որը Ջրտնտպետկոմում վերջին անգամ 2016-ին է ստուգում իրականացրել. «Դա անընդունելի է, որ նստենք 10-15 հոգով ՀԿ-ների հետ որոշենք՝ ջուրը բաց թողնե՞նք, թե՞ չէ»:
ՀՀԿ պատգամավոր Միհրան Պողոսյանը հարցրեց՝ կա՞ որոշակի երկարաժամկետ հատվածով մասնագիտական եզրակացություն. «Դուք խոսեցիք անցածի վերաբերյալ, իմ հարցը ապագայի վերաբերյալ է՝ առաջիկա 20-30 տարում Սեւանի մակարդակի տատանումը ինչպե՞ս է լինելու: Մեր քննարկումների առարկա պետք է կարողանանք դարձնենք եւ մեր որոշումը դրան համապատասխան իրականացնենք»:
Հարությունյանը պատասխանեց, որ 30 տարվա ծրագիր կա, 2002-ից մինչեւ 2030 թվականը Սեւանա լճի մակարդակը պետք է բարձրացնել 6 մետրով: Ըստ Արսեն Հարությունյանի, ավելի շուտ կհասնեն իրենց նախանշած արդյունքին. «Այսօր 1900.91 նիշն ունենք»:
Հռիփսիմե ՋԵԲԵՋՅԱՆ
