Գլխավոր դատախազ Արթուր Դավթյանը այսօր 2016-ի տարեկան գործունեության հաղորդումը Աժ-ում ներկայացնելիս խոսեց ՊՊԾ գնդի գրավման դեպքերի մասին:
«Ելքի» պատգամավոր Էդմոն Մարուքյանն ասաց՝ որեւէ գնահատական չտվեցիք այդ դեպքերի ժամանակ 27 լրագրողների եւ օպերատորների նկատմամբ բռնություններին, ծեծ ու ջարդին: Տեխնիկա է ոչնչացվել նաեւ եւ այդ մասը բաց թողնվեց, ունե՞նք մեղադրյալներ, կալանավորվա՞ծ են:
Արթուր Դավթյանը պատասխանեց, որ այո, իր խոսքում զանգվածային անկարգությունների դեպքերին չի անդրադարձել. «Ունեցանք հարուցված քրգործեր, որոնք վերաբերում էին լրագրողների կամ խաղաղ բնույթի հանրահավաքներին մասնակցած անձանց նկատմամբ բռնության դեպքերին: Սարի թաղում տեղի ունեցած դեպքերին 8 անձինք դատի են տրվել՝ կալանավորմամբ, 4-ի նկատմամբ վճիռ է կայացվել ազատազրկել»:
Էդմոն Մարուքյանը արձագանքեց՝ այդ 8 անձանց մեջ կա՞ ոստիկան, որը դատի է տրվել լրագրողի մասնագիտական գործունեությունը խոչընդոտելու եւ բռնություն կիրառելու համար: Դատախազը հաստատեց՝ 8-ը դատի են տրվել լրագրողի մասնագիտական գործունեությանը խոչընդոտելու համար, քաղաքացիների նկատմամբ բռնություն կիրառելու, բայց 8-ն էլ եղել են քաղաքացիական ծառայողներ: Գլխավոր դատախազը հուսադրեց՝ ոստիկանների գործերը առջեւում է, պարտադիր գնահատական կտրվի համապատասխան անձանց արարքներին:
Արթուր Դավթյանն իր խոսքում ասել էր, որ կալանքների վերաբերյալ ՀՀ-ում կա թյուր կարծիք, թե շատ է կիրառվում՝ որպես խափանման միջոց:
Էդմոն Մարուքյանը նկատեց, որ գլխավոր դատախազությունում խորհրդակցության ժամանակ նախագահ Սերժ Սարգսյանն է նաեւ այդ հարցը բարձրացրել ու եթե այդ կարծիքը թյուր է, ինչու է նաեւ այդ մակարդակով հարցը բարձրացվում:
Գլխավոր դատախազն ասաց, որ կալանքը մասսայաբար չեն կիրառում, յուրաքանչյուր դեպք առանձին քննվում է, պարզապես կալանքը փոխելու միջնորդություններն են ոչ պատշաճ ներկայացվում:
Մարուքյանը նաեւ հետաքրքրվեց՝ սպանությունների հետ կապված Լոռու մարզում 400 տոկոս աճ է գրանցվել, ինչո՞ւ է այդպիսի աճ գրանցվել, ի՞նչ է եղել: Լոռիի աննախադեպ սպանությունների թվի աճի հետ կապված դատախազն ասաց, որ ուսումնասիրություններ են կատարվում, որ պարզեն՝ կրկնակի հանցագործությունների հետ է կապված, թե՞ ինչի:
Էդմոն Մարուքյանը նաեւ Հաց բերողի կալանավորման հետ կապված հարց ուղղեց: Արթուր Դավթյանը պատասխանեց, որ «Հաց բերողին կալանքի տակ պահելու հիմքերը բացարձակ առկա էին»:
Հռիփսիմե ՋԵԲԵՋՅԱՆ
