Քիշնեւի կենտրոնում գտնվում է Գեղարվեստի ազգային թանգարանը, այն ավելի քան 30000 ցուցանմուշ ունի: Թանգարանը 1939թ. հիմնադրել է ճանաչված քանդակագործ Ալեքսանդրու Պլամադեալան, որի անունով նաեւ գեղարվեստի քոլեջ կա Քիշնեւում: Քոլեջը նախկինում կրել է Իլյա Ռեպինի անունը:
Ինչ վերաբերում է Քիշնեւի գեղարվեստի ազգային թանգարանին, վերջինիս տեղում ժամանակին եղել է կանացի գիմնազիա` արքայադուստր Մարիայի անունով, իսկ խորհրդային տարիներին շենքը դարձել է կենտկոմի քարտուղարի նստավայրը:
1962 թ. երբ ողջ Մոլդովայում փակվեցին եկեղեցիները, նրանց հարստությունը` ներառյալ բացառիկ սրբապատկերները, ի պահ տրվեցին թանգարանին:
Մոլդովական թանգարանները պարբերաբար հովանավորվում են ռումինական կառավարության կողմից, օրինակ, նրանցից մեկը վերջերս վերանորոգման նպատակով մեկ միլիոն եվրո է ստացել:
Մոլդովական բոլոր հաստատությունների ցուցանակները ռումիներեն են, մոլդովացիների 50%-ը հակված է միավորվելու Ռումինիայի հետ, շատերը գտնում են, որ այդպիսով կվերականգնվի պատմական արդարությունը: Կրթական հաստատությունները եւս ավարտական վկայականները ռումիներեն են լրացնում: Նրանց ղեկավարները գտնում են, որ մոլդովերեն լեզու, որպես այդպիսին՝ չկա եւ Խորհրդային կարգերի ժամանակ հորինված արտահայտություն է: Ըստ մեզ հետ զրուցած մոլդովացիների, ռուսախոսներն, ընդհակառակը, դեմ են Ռումինիայի հետ միավորմանը եւ հակառուսական տրամադրություններին:
Ի դեպ, Aravot.am-ի հետ զրույցում կրթական հաստատությունների ներկայացուցիչները դժգոհում էին Մոլդովայի կրթության նախարարների անընդհատ փոփոխվելուց: Այժմ էլ որոշվել է միավորել մշակույթի, սպորտի, կրթության նախարարությունները:
Գոհար ՀԱԿՈԲՅԱՆ
Քիշնեւ-Երեւան
Լուսանկարները` հեղինակի
