«Չկա խաղաղության մասին պայմանագիր, կա զինադադար, որն իշխանավորների համար չակերտներում է. գիտեն, թե պատերազմը վերջացել է, ընկել են իրենց անձնական գործերով եւ երկիրն են թալանում»,-«Բլից ինֆո» մամուլի ակումբում այսօր անդրադառնալով Արցախյան հակամարտության կարգավորման խնդրին, ասաց «Արժանապատիվ ազատամարտիկ» հիմնադրամի հոգաբարձուների խորհրդի նախագահ, Արցախյան պատերազմի մասնակից Գագիկ Սարուխանյանը:
«Պատերազմը չի ավարտվել: Այսօրվա ՀՀ բանակը կրկնապատճենն է սովետական բանակի, մինչդեռ անկախ Հայաստանը չի կարող նման բանակ ունենալ: 18 տարեկան երեխային տանում են առաջնագիծ, իսկ փորձառու ազատամարտիկներին ասում են՝ գնա կանգնի «ստայանկեն»՝ երկու կոպեկ փող աշխատի: Թալան է բանակում… Մեր նման երկիրը չունի շռայլության այնպիսի իրավունք, որ բանակ թալանի»,-դժգոհեց ազատամարտիկը:
Նրա բնորոշմամբ. «Արցախը ՀՀ մաս է եւ վերջ, այս տրամաբանությամբ պետք է գործել»: Ինչ վերաբերում է ՌԴ-ի կողմից Ադրբեջանին զենքի հերթական խմբաքանակի մատակարարմանը, Սարուխանյանի խոսքով. «Գեներալներն ասում են՝ «դե Ռուսաստանը մեր ընգերն ա, ինչ կա՞ որ, բիզնես է, անում է»…այ այսպիսի գեներալներ ունենք»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
