Տավուշի մարզի առաջին ատյանի դատարանում ներկայումս ընթանում է Դիլիջան քաղաքի բնակիչ Արթուր Մարկոսյանի դատավարությունը: Նա մեղադրվում է այն բանում, որ 2017թ. հունիսի 11-ի ժամը 15-ից մինչեւ 18.40-ն ընկած ժամանակահատվածում Դիլիջանի Այգեստան փողոցի առաջին նրբանցքում, գտնվելով ոչ սթափ վիճակում, հասարակական կարգը կոպիտ կերպով խախտելու դիտավորությամբ ինքնահաստատման եւ հասարակության հանդեպ երեւակայական գերազանցությունն արտահայտելու հանդուգն ձգտումով բարձրաձայն հայհոյել է իր թաղամասի կանանց եւ մյուս բնակիչներին, որին արձագանքած Հովհաննես Դավթյանի հասցեին հնչեցրել է «այ լակոտ, արի մոտիկ ասեմ» արտահայտությունը, միաժամանակ բռնություն գործադրելով՝ քաշքշելով անհիմն վիճաբանել է հայր եւ որդի Հովհաննես եւ Համլետ Դավթյանների հետ, նաեւ տվել է բռնություն գործադրելու սպառնալիքներ, իր սանձարձակ վարքագծով խաթարել է թաղամասի բնակիչների առօրյան՝ շուրջ մեկ ժամ բացահայտ անհարգալից վերաբերմունք դրսեւորելով շրջապատի նկատմամբ` կոպիտ կերպով խախտել հասարակական կարգը:
Ա. Մարկոսյանին մեղադրանք է առաջադրվել ՀՀ քրեական օրենսգրքի 258 հոդվածի 2-րդ մասով: Ըստ «Դատալեքս» տեղեկատվական համակարգի՝ նրա նկատմամբ խափանման միջոց է ընտրվել չհեռանալու մասին ստորագրությունը:
Ոսկան ՍԱՐԳՍՅԱՆ
