Աուդիտորական գործունեության մասին ՀՀ օրենքում կառավարությունն ուզում է փոփոխություններ կատարել: ԱԺ-ում նախագծի քննարկման ժամանակ ֆինանսների փոխնախարար Դավիթ Անանյանին պատգամավորները հիմնականում հարցեր ուղղեցին պարտադիր աուդիտի արդյունավետության մասին:
ԱԺ փոխնախագահ Միքայել Մելքումյանն ասաց. «Ինչի՞ խոշոր միջազգային կառույցները ՀՀ միջին եւ խոշոր ընկերություններին խոշոր վարկեր չեն տալիս: Հիմնական փաստարկն այս է՝ թափանցիկ մենեջմենթ չկա, ես չեմ վստահում քեզ, ունես սեւ հաշվապահություն: Եթե ձեռնարկությունը գործի լեգալ բոլոր հարկերը մուծելով, բոլոր ծախսերը ցույց տալով՝ կունենա՞ ձեռնարկությունը շահութաբերություն, թե՞ չէ: Եթե մենք չեք կարողանում տնտեսագիտորեն գրագետ ձեւավորենք, թե ինչո՞ւ այդ սեւ հաշվապահությունը չի լուսավորվում, անընդհատ սեւ է մնում ինչ-որ մաս, մենք ձեր ասած աուդիտի մասով էլ միշտ պրոբլեմ ենք ունենալու: Կիսատ է մնալու, աուդիտն էլ են չէ մեր համապատասխան քաղաքացիները անում, փող կտան՝ կասեն արա: Մեռած օրենքներ մեզ պետք չեն»:
«Ծառուկյան» խմբակցության անդամ Վարդան Բոստանջյանն էլ ասաց, որ մենք աուդիտորական գործունեության մշակույթը այդպես էլ չենք հասկացել: Դա վստահության ինստիտուտն է, որը միայն ճիշտ աուդիտի պայմաններում կարող է լինել. «Մեր տնտեսվարող սուբյեկտների գործունեության արդյունավետությունը չենք կարող իմանալ: Անընդհատ գցում-բռնում ենք՝ ստվերը շատ է, քիչ է: Չենք կարող իմանալ, որովհետեւ աուդիտ չի լինում»:
Հռիփսիմե ՋԵԲԵՋՅԱՆ
