Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» խմբի անդամներից 18-ի գործով հերթական դատական նիստն է: Մեկնարկից առաջ կրկին դատարանի կարգադրիչների եւ փաստաբանների միջեւ անհամաձայնություն տեղի ունեցավ: Մուշեղ Շուշանյանն արդեն որերորդ անգամ ներս չմտավ՝ հրաժարվելով, իր խոսքով, խուզարկվել: Լուսինե Սահակյանի պայուսակի զննության ժամանակ էլ մետաղորսիչ սարքն ազդանշան տվեց, սակայն փաստաբանը հրաժարվեց բացել պայուսակը՝ ասելով, որ արգելված իր դրանում չկա: Կարգադրիչն առաջարկեց ազատվել մետաղական իրերից:
«Ամեն ինչն էլ մետաղական է: Անձնագրիս կազմը, դրամապանակս, գրիչը, նոթատետրը մետաղական մասեր ունեն: Պայուսակս դատարկել չեմ պատրաստվում»,-առարկեց Լուսինե Սահակյանը: Նա կատարվածի մասին գրություն թողեց դատավորին եւ սպասեց դատարանի բակում:
Լրագրողների հետ զրույցում նա ասաց՝ դատարանների նախագահների խորհրդի կողմից արգելված իրերի ցանկ սահմանելու փաստը չի կարող իրավական ակտ համարվել:
Լուիզա ՍՈՒՔԻԱՍՅԱՆ
