Այսօր, ինչպես տեղեկացրել ենք ԱԺ-ում «Ելք» խմբակցության ղեկավար Նիկոլ Փաշինյանը Միգրացիոն պետական ծառայության պետ Գագիկ Եգանյանից հետաքրքրվեց Ռուսաստանից արտաքսված քաղաքացիների մասին: Եգանյանն ասաց, որ իրենք դիմում են ՌԴ եւ խնդրում են մեղմացնել պատժամիջոցները հայերի նկատմամբ:
«Ելքի» պատգամավոր Գեւորգ Գորգիսյանը Եգանյանին հարցրեց՝ «ՀՀ-ն չի՞ պատրաստվում Եվրոպական դատարանում վիճարկել այս հարցը, որովհետեւ, ըստ էության, մարդու ազատ կյանքի խաթարում է տեղի ունենում,ազատ տեղաշարժվելու իրավունքի ոտնահարում՝ այն պարագայում, երբ ԵԱՏՄ-ում առնվազն աշխատուժի ազատ տեղաշարժի հարցը պետք է երաշխավորված լինի»:
Եգանյանը պատասխանեց. «Սա յուրաքանչյուր պետության ինքնիշխանության իրավունքի հարցն է, ընդունված քաղաքականություն է եւ պրակտիկա: Ամեն երկիր ինքն է իր խնդիրներից ելնելով՝ որոշում ինչպիսի պայմաններ սահմանի օտարերկրացիների մուտքի, բնակվելու հարցում: ՌԴ-ում վերջին 5-6 տարիներին բավականին աղմկահարույց քրեական պատմություններ եղան, որի առանցքում օտարերկրացիներն էին գտնվում, ինչու չէ՝ նաեւ հայերը: Դա ստիպեց իրենց, որ հակամիգրացիոն քաղաքականություն իրականացնեն»:
Ըստ Գորգիսյանի, ՌԴ-ն պարտավոր է մարդու իրավունքները չխախտել. «Եթե դիմում եք գրում, բավարարվում է, ստացվում է, որ կան հիմքեր, որ մարդուն ներս թողնեն: Սա նվաստացուցիչ է, որ ամեն քաղաքացու համար դուք պետք է գնաք խնդրեք: ՄԻԵԴ-ը, կարծում եմ, ճիշտ հարթակ է»:
Եգանյանը պատասխանեց, որ ՌԴ-ն իր օրենսդրությունը ծառայեցնում է՝ իր առջեւ ծառացած խնդիրները լուծելու համար: Ինքն իր համար կարգ է սահմանել՝ կարգազանց օտարերկրացիները չպետք է իրենց երկիր մուտք գործեն: Միջամտելը, ըստ Եգանյանի, ճիշտ չէ:
Հռիփսիեմ ՋԵԲԵՋՅԱՆ
