Սեւանի Ճանապարհային ոստիկանության հենակետի հետնամասում վթարվել էր Լճաշենի խորքային հորերի ջուրը դեպի «Սեւան» օրվա կարգավորիչ ջրամբարը սնուցող, ինչպես նաեւ հարակից համայնքներին կենարար հեղուկ մատակարարող 500մմ տրամագծով ջրատարը: Դրա հետեւանքով դադարեցվել էր Սեւան քաղաքի, Վարսեր, Գագարինավան, Ցամաքաբերդ համայնքների, «Սեւան» քրեակատարողական հիմնարկի ջրամատակարարումը:
Հաշվի առնելով տեղանքի ռելիեֆը, անբարենպաստ եղանակային պայմաններն ու սպասվող աշխատանքի մեծ ծավալը, ընկերությունը ստիպված էր նշված բնակավայրերում 36 ժամով ջրանջատում հայտարարել: Օրենքը նման երկարաժամկետ ջրանջատում թույլատրում է, բայց բնակիչներին ու հիմնարկ-ձեռնարկություններին այդքան երկար ժամանակ թողնել անջո՞ւր… Բա պատասխանատվությո՛ւնը սպառողների առջեւ, բա մարդկային խի՛ղճը: Վեոլիա Ջրում նշված 36 ժամը դիտարկվեց որպես ծայրահեղ թույլատրելի, բայց ոչ պարտադիր, առավել եւս՝ ընդունելի ժամկետ: Ամեն ինչ պետք էր անել ժամ առաջ ջրամատակարարումը վերսկսելու համար:
Դրա համար ջրատարը դատարկվելուն անմիջապես հաջորդեց Ընկերության «Արեւելք» տարածաշրջանի տնօրինության «Սեւան» տեղամասի աշխատակիցների կողմից տեղանքի ուսումնասիրությունը: Ասֆալտը քանդելուց հետո պարզվեց, որ մետաղական խողովակաշարը զոդման «կարից» պոկվել էր, ինչի հետեւանքով ջուրն աննպատակ հոսում-կորչում էր ինչ-որ տեղ խորքերում: Խնդրի լուծման նպատակով, սկզբում մասնագետները եռակցման միջոցով վերականգնեցին խողովակաշարը, սակայն, որպեսզի վստահ լինեն, որ հետագայում նմանատիպ իրավիճակ չի կրկնվի, խողովակի վրա եւս մեկ մետաղյա շերտ ավելացրեցին:
Ընդհանուր առմամբ, տեղավորվեցին 28 ժամում` թե՛ իրենց, թե՛ սպառողների համար տնտեսելով 8 թանկագին ժամ: Գումարած` տնտեսված վայրկյանում 3 լիտր ջրաքանակը, որն ուղղվեց բնակավայրերի ջրամատակարարման բարելավմանը:
«Վեոլիա Ջուր» ՓԲԸ
Հանրային կապերի ծառայություն
