Սեպտեմբերի 28-ին Գերմանիայի Օբերսդորֆ քաղաքում կմեկնարկի գեղասահքի վարկանիշային մրցաշար, որտեղ կխաղարկվեն 2018 թվականին Հարավային Կորեայի Պհենչհան քաղաքում կայանալիք ձմեռային օլիմպիական խաղերի վերջին ուղեգրերը:
Մրցաշարին կմասնակցեն Հայաստանի ներկայացուցիչներ, մենասահորդներ Սլավիկ Հայրապետյանը, Անաստասիա Գալուստյանը եւ Թինա Կարապետյան/Սիմոն Պրու Սենեկալ պարային երկյակը:
Գեղասահքի Հայաստանի ֆեդերացիայի նախագահ Մելանյա Ստեփանյանի խոսքերով, մեր գեղասահորդները պատրաստվում են պատասխանատու մեկնարկին:
«Օլիմպիական վարկանիշ նվաճելու ավելի մեծ հնարավորություններ ունի Անաստասիա Գալուստյանը, որին այս տարի Հելսինկիում կայացած աշխարհի առաջնությունում ընդամենը մեկ տեղ չբավականացրեց Պհենչհանի օլիմպիական ուղեգրի համար: Անաստասիան վերջերս միջազգային մրցաշարի մասնակցեց Իտալիայում: Ճիշտ է, այնքան էլ բարձր արդյունք ցույց չտվեց, բայց նրան անհրաժեշտ մարզավիճակն անհրաժեշտ է ընտրական մրցաշարում: Հիմա նա մարզվում է Մոսկվայում՝ իր ծնողների մոտ:
Սլավիկ Հայրապետյանը մարզվում է Ադլերում՝ Ալեքսեյ Ուրմանովի եւ հոր՝ Սամվել Հայրապետյանի ղեկավարությամբ: Սեպտեմբերի 22-ից 26-ը նա հանդես կգա Բրատիսլավայում կայանալիք մրցաշարում, որտեղից անմիջապես կմեկնի Օբերսդորֆ:
Մեր պարային երկյակը Կանադայում է: Թինան եւ Սիմոնը Սոլթ Լեյք Սիթիում մասնակցեցին միջազգային մրցաշարի: Նրանք նույնպես նախատեսում են հանդես գալ Սլովակիայում:
Սեպտեմբերի 27-ին բոլորով կհավաքվենք Օբերսդորֆում: Կանխատեսումներ անել չեմ ցանկանում, բայց հավատում եմ մեր մարզիկներին: Կարիք չկա նրանց բացատրել վարկանիշային մրցաշարի կարեւորությունը: Վստահ եմ՝ սառույցի վրա կանեն առավելագույնը, արդյունքի հասնելու համար»,- ասում է Մելանյա Ստեփանյանը:
Աշոտ ՀԱԿՈԲՅԱՆ
