Այսօր ԱԺ արտահերթ նիստում ֆինանսների փոխնախարար Դավիթ Անանյանը (լուսանկարում) ներկայացրեց ՀՀ Հարկային օրենսգրքում փոփոխություններ եւ լրացումներ կատարելու մասին փաթեթը: 240 դրույթներում փոփոխություն է առաջարկվում անել, որոնցից բովանդակային փոփոխությունները շուրջ 30-նն են:
Օրինակ, փոփոխություններից մեկն այն է, որ Հարկային օրենսգրքի քննարկման ժամանակ հարկային մի շարք արտոնություններ վերացրել էին, հիմա գտնում են, որ սխալ են վարվել: Ներգնա մասնագիտացված տուրիզմի տնտեսվարողներից մտահոգություններ են լսել եւ որոշել ներգնա տուրիզմը ԱԱՀ-ից ազատելու նորմը վերականգնել: Անանյանն ասաց, որ կառավարությունը առայժմ վերականգնում է արտոնությունը՝ 3 տարի հետո այն նորից քննարկելու նպատակադրումով:
Պտուղներից եւ հատապտուղներից պատրաստված օղիների ակցիզային հարկի դրույքաչափերը վերանայում են: Պտուղներից եւ հատապտուղներից պատրաստված օղիների արժեքը, ՊԵԿ-ից ստացված տեղեկատվության համաձայն, 1 լիտրը 3.500-4000 դրամի սահմաններում է, երբեմն հասնում է 7000 դրամի: Ակցիզային հարկի գծով լինելու են էական հարկային խնայողություններ:
Բազմակի օգտագործման տարաների հարկման հետ կապված խնդիր կա, ԱԱՀ-ով հարկման շրջանակի մեջ չեն մտնում, ստացվում է, որ տարայի հարկումը ԱԱՀ-ից ազատված էր, հիմա առաջարկում են, որ այն դեպքում, երբ տարան վերադարձելի չէ, այդ տարայի օտարման գործարքը միայն ազատվի ԱԱՀ-ից:
Մյուս կարեւոր փոփոխությունը հիփոթեքային վարկի տոկոսների փոխհատուցմանն է վերաբերում: Դավիթ Անանյանն ասաց. «Կառավարությունը մոնիտորինգի է ենթարկել վերջին 3 տարիներին հիփոթեքային վարկի տոկոսների փոխհատուցման արդյունքում ստեղծված իրավիճակը եւ եկել եզրակացության, որ այն նպատակադրումները, որ եղել են՝ ստեղծել գնողունակության պահանջարկ շինարարության ոլորտում, սոցիալական բաղադրիչը հաշվի առնել, չի արդարացրել իրեն: Դրանից օգտվել է հանրության գնողունակ հատվածը, անտեսվել է սոցիալական բաղադրիչը: Հիմա կառավարությունը հանում է բիզնեսի նպատակադրումները: Եթե պետբյուջեի եկամուտների հաշվին ֆինանսավորվում է տնտեսության որեւէ ճյուղ, ապա շինարարության ոլորտը այն բացառիկ ճյուղը չէ, որտեղ եկամուտների հաշվին ներդրումներ կատարեն: Շատ ավելի առաջնահերթ ճյուղեր կան, որտեղ ներդրում անելով՝ հնարավոր է ունենալ տնտեսական աճ»:
Հետևաբար` կառավարությունն առաջարկում է, որ այսուհետեւ բազմաբնակարան շենքի կառուցապատողից բնակարանի այդ համակարգով ձեռքբերման, անհատ ձեռնարկատեր եւ կազմակերպություն հանդիսացողից բնակելի տուն ձեռք բերելու առավելագույն շեմ սահմանել 55 մլն դրամը: Երկրորդ սահմանափակումն այն է, որ առանձնատուն ձեռք բերելիս, բազմաբնակարան շենքում բնակարան ձեռք բերելիս եւ պետության համայնքից բնակարաններ ձեռք բերելու գործարքների ժամանակ եկամտային հարկի հետ ստացման, այսինքն, պետության համաֆինանսավորման շեմ է սահմանվում եռամսյակի համար 1.5 մլն դրամը: Նաեւ այսուհետեւ՝ 2018-ի հունվարի 1-ից հետո անձը այս համակարգից կարող է օգտվել միայն մեկ անգամ:
Ելքի» պատգամավոր Գեւորգ Գորգիսյանը հարցրեց՝ ինչո՞ւ եք 55 մլն դրամ սահմանում բնակարանի արժեքի համար: Փոխնախարարը պատասխանեց, որ դա նորմալ բնակարան է՝ կենտրոնում: Պարոն Անանյանն ասաց, որ պետությունը իր սուղ միջոցներով չի կարող օգնել, որ մարդիկ ձեռք բերեն 2-րդ, 3-րդ բնակարանը:
Գորգիսյանը հարցրեց՝ ենթադրենք ընտանիքն ապրում է 2 սենյականոց բնակարանում, հետագայում 4 երեխա են ունենում եւ բնակարանը արդեն փոքր է իրենց համար, այս նախագծով վնասում ենք դեմոգրաֆիական խնդիրների լուծմանը: Դավիթ Անանյանն էլ պատասխանեց. «Անձը, եթե այս համակարգի միջոցով մեկ անգամ ձեռք է բերել բնակարան, երկրորդ անգամ ձեռք բերելու դեպքում պետք է օգտագործի իր սեփական միջոցները»:
Փոխնախարարն ասաց, որ կառավարությունը գտնում է, որ ավելի լավ է այդ միջոցներն ուղղեն այն ընտանիքներին, որոնք չունեն բնակարան, քան թե օգնեն գնողունակ մարդկանց: Իսկ մոնիտորինգի արդյունքները, ըստ փոխնախարարի, ցույց է տվել, որ անգամ մարդիկ, որոնք 10 մլն-ից ավելի եկամուտ ունեն, իրենց թույլ են տվել այս համակարգով 5-6 անձանց գույք ձեռք բերել:
Հռիփսիմե ՋԵԲԵՋՅԱՆ