«Մարդկային զարգացման միջազգային կենտրոնի» նախագահ Թևան Պողոսյանի կարծիքով՝ կառավարության շնչին պետք է նստել:
«Բլից ինֆո» մամուլի ակումբում լրագրողների հետ հանդիպմանը պարոն Պողոսյանը զուգահեռներ տարավ, թե ինչպես են ծնողները վերաբերվում լացող երեխային և ինչպիսի մոտեցում ունի կառավարությունը հասարակության նկատմամբ: Նա նկատեց. «Երբ փոքր երեխան սոված է լինում, բայց խոսել չի իմանում, լաց է լինում: Բայց որ մեծ տարիքում է լաց լինում, ասում են՝ լացկան մի եղիր, քո խնդիրներն ինքնուրույն լուծիր: Այստեղ փաստորեն նաև ծնողի խնդիրն է, թե ինքն ինչ դաշտ կձևավորի: Ծնողը՝ այս դեպքում կառավարությունը, նայում է քաղաքացիներին ու ասում ՝ ի՞նչ անենք, մեծ երեխաներ են, լացում են, թող լացեն: Սա նշանակում է, որ մենք պետք է իրավիճակ փոխենք, որպեսզի այսօրվա կոալիցիան հասկանա, որ ինքը պետք է աշխատի: Մենք պետք է նստենք կառավարության շնչին»:
Ըստ Թևան Պողոսյանի՝ կառավարությունն իր վարած քաղաքականությամբ չի ապահովում հասարակության հետ ակտիվ կապ, հաղորդակցություն չկա հասարակության և կառավարության միջև:
Նրա համոզմամբ՝ այն, որ ԵԱՏՄ-ն Հայաստանին իր պահանջներն էր ներկայացնելու, բոլորին էր հայտնի, հայտնի էր նաև, որ մի խումբ ապրանքներ հունվարի 1-ից թանկանալու են: Սակայն կառավարությունը դեռ ամիսներ առաջ պետք է պատրաստեր հանրությանն այս ամենին. «Կառավարությունը նաև չի տեղեկացնում երկրի քաղաքացուն այն քայլերի մասին, որ պատրաստվում է իրականացնել: Օրինակ՝ հիմա թանկացումներ են սկսվել, բայց թե մի քանի ամիս անց ինչ գործընթացներ կսկսվեն՝ որևէ մեկս տեղյակ չէ»:
Տաթև ՀԱՐՈՒԹՅՈՒՆՅԱՆ
