Ազգային ժողովի պետական-իրավական և մարդու իրավունքների պաշտպանության հարցերի մշտական հանձնաժողովում քննարկվում է ՀՀ կառավարության ներկայացրած «Հայաստանի Հանրապետության ընտրական օրենսգիրք» սահմանադրական օրենքում եւ մի շարք այլ օրենքներում փոփոխություններ և լրացումներ կատարելու մասին նախագիծը:
Կառավարության ներկայացուցիչ, արդարադատության փոխնախարար Արթուր Հովհաննիսյանի (լուսանկարում) խոսքով, առաջարկվող նախընտրական քարոզչության սահմանափակումները վերաբերում են նաև հանրային ծառայողներին, առողջապահական կամ բժշկական կազմակերպությունների, ուսումնական հաստատությունների, նախադպրոցական ուսումնական հաստատությունների աշխատողներին՝ իրենց լիազորություններն իրականացնելիս կամ ի պաշտոնե հանդես գալիս:
Սրան զուգահեռ որոշ պաշտոնյաների, ընդհանրապես արգելվում է քարոզչություն իրականացնել՝ դատավորներ, դատախազներ, քննչական մարմիններում, ոստիկանությունում, Ազգային անվտանգության ծառայությունում, քրեակատարողական հիմնարկներում, դատական ակտերի հարկադիր կատարման ծառայությունում, պրոբացիոն ծառայությունում, փրկարար ծառայությունում ծառայողներ, զինծառայողներ, ընտրական հանձնաժողովների անդամներ, բարեգործական և կրոնական կազմակերպությունների, միջազգային կազմակերպությունների ներկայացուցիչներ, օտարերկրյա քաղաքացիներ և կազմակերպությունների ներկայացուցիչներ, քաղաքացիություն չունեցող անձինք, մարդու իրավունքների պաշտպան, Կենտրոնական բանկի խորհրդի անդամներ, Հաշվեքննիչ պալատի անդամներ, Հեռուստատեսության եւ ռադիոյի հանձնաժողովի անդամներ, ինքնավար մարմինների անդամներ:
Իսկ ահա լրատվամիջոցների համար սահմանափակումները հանվել են: Եթե գործող օրենքով մեկ լրատվամիջոց կարող էր 50 լրագրող հավատարմագրել, նախագծով՝ որքան ուզի:
Նելլի ԳՐԻԳՈՐՅԱՆ
