Հոգեբան Սամվել Խուդոյանի կարծիքով՝ Արցախում 19-ամյա Ասյա Խաչատրյանի հետ կատարվածն ավելի շատ անեկդոտային, քան անհանգստանալու բան է:
Հիշեցնենք՝ ՀՀ քաղաքացի Ասյա Խաչատրյանը պնդում է, որ Արցախ կատարած այցելության ընթացքում ոստիկաններն իր նկատմամբ ֆիզիկական և հոգեբանական ճնշում են կիրառել:
«Զարկերակ» մամուլի ակումբում լրագրողների հետ հանդիպմանը պարոն Խուդոյանը նշեց, թե ակնհայտ է, որ այդ աղջիկն ինչ-որ սադրանք է արել, որի մանրամասները չգիտենք. «Այն նկարները, որ հրապարակել է, դրանցից ակնհայտ է, որ նա կարող էր պրովոկացիա անել: Բայց միևնույն ժամանակ ոստիկաններն էլ պետք է իրենց կոռեկտ պահեին: Աղջիկ է՝ մի բան էլ կարող է այնպես չլինի, ոստիկանը պիտի կոռեկտ պահի իրեն»:
Ազատամարտիկ, հետախույզ Վովա Վարդանովը նկատեց, թե Ասյա Խաչատրյանի վարքագիծը ձևավորվել է նաև մեր բացթողումների պատճառով. «Մի չար բան է տեղի ունեցել, ինչն այդ աղջիկն այնքան չի հասկանում, երբեմն մենք էլ չենք հասկանում. տարանջատելով ասում ենք՝ Արցախը Հայաստան չէ: Մինչդեռ Հայաստանը Քուռի ափով սկսում է և վերջանում Սեբաստիայի, Մալաթիայի, Երզնկայի կողմերը: Այս աղջիկը մեր թերացումների պատճառով այդ ձևով է դաստիարակվել. ինքն էլ է տարանջատում: Ու դա որոշ ուժեր ֆիշկա են դարձրել: Այդ աղջիկը մի քանի օրից գալու է մեր հավաքներին մասնակցելու, հետը կաշխատենք, նորմալ երեխա կդառնա: Մի քիչ բոյեվոյ է, նրա բռնած ուղղությունը կշտկենք»:
Տաթև ՀԱՐՈՒԹՅՈՒՆՅԱՆ
