ՀՀ զինված ուժերի 2018-24թթ. արդիականացման ծրագրում (որը վերջերս հրապարակել է ՀՀ պաշտպանության նախարարությունը) որպես արդիականացման նպատակ է նշված արդյունավետ ռազմական կառավարման համակարգի և կատարելագործված մարտական վարպետության ներդնումը: Ըստ այդմ, կիրականացվի պետական ու ռազմական կառավարման համակարգերի ներդաշնակեցում՝ հիմքում ունենալով զորքերի կառավարման և ղեկավարման անընդհատությունը: Ըստ փաստաթղթի՝ կառավարման համակարգի չորս հիմնական բնորոշիչները կլինեն՝ կառավարման ապակենտրոնացումը, կապի և կառավարման կետերի արագ վերականգնելիությունը և տարաբաշխումը, ինչպես նաև որոշումների կայացման պատվիրակումը:
Այդ նպատակով ներդրվելու է նոր միասնական ավտոմատացված կառավարման համակարգ՝ հասնելով թվայնացված կառավարման: Իսկ «Հրամանատրում առաջադրանքի միջոցով» կառավարման սկզբունքի կենսագործումը վերաբերում է ենթականերին նախաձեռնություն ցուցաբերելու և սեփական դատողությունը կիրառելու հարցում իրավազորելուն՝ հնարավոր դարձնելով զորքերի կիրառման առավել ճկունությունն ու արագաշարժությունը: Իսկ մարտական վարպետության կատարելագործման տեսանկյունից կարևորվում է ռազմական գործողությունների վարման ձևերի ու եղանակների՝ ռազմարվեստի արդիականացումը՝ զինված ուժերի պատրաստությունը հավանական պատերազմի բնույթին համապատասխանեցնելու նպատակով: Այն իրականացվելու է օպերատիվ, զորահավաքային և մարտական պատրաստության և դրա գնահատման, մարտական հերթապահության մակարդակի բարձրացման միջոցով:
Ռազմարվեստի արդիականացումը ՀՀ զինված ուժերի ստորաբաժանումներին թույլ կտա զբաղեցրած դիրքերի համառ պաշտպանությունը համատեղել իրականացվող զորաշարժային գործողությունների հետ, իրենց պատրաստվածությամբ, գործողությունների վճռականությամբ և կամքի պարտադրմամբ հասնել քանակական ցուցանիշներով գերազանցող հակառակորդին վարպետությամբ գերազանցող ստորաբաժանումների կողմից խնդիրների առավել արդյունավետ կատարման:
Մարտական վարպետության կատարելագործման նպատակով ծրագրվում է մշակել բարոյահոգեբանական պատրաստության ծրագիր և գնահատման համակարգ: Նախատեսվում է բարձրացնել նաև զինված ուժերում արհեստավարժ անձնակազմի մասնաբաժինը: Եվ վերջապես, նախատեսվում է ներդնել մարտական գործողությունների նմանակման, մոդելավորման ու խաղարկման արդիական վարժասարքեր, որոնք թույլ կտան զորավարժություններ և վարժանքներ իրականացնել ընդհուպ բանակային կորպուսների և ամբողջ զինված ուժերի կազմով:
Պատրաստեց Լուիզա ՍՈՒՔԻԱՍՅԱՆԸ
