Եվրոպա լիգայի քառորդ եզրափակչի «Արսենալ»-ԲԿՄԱ առաջին հանդիպման նախօրեին թիմերի գլխավոր մարզիչները հույս են հայտնել, որ դիվանագիտական հարաբերությունները չեն ազդի իրենց հանդիպումների եւ երկրպագուների վրա:
«Ոչ ոք չգիտի, թե իրականում ինչ է կատարվում վարագույրների ետեւում: Այս պահին դրանք դիվանագիտական լարված հարաբերություններ են: Հույս ունեմ, որ դա ոչ մի կերպ չի ազդի մեր խաղերի եւ երկրպագուների վրա՝ ինչպես ռուս, որոնք եկել են այստեղ, այնպես էլ անգլիացիների, որոնք մտադիր են ներկա լինել պատասխան խաղին», – հայտարարել է Արսեն Վենգերը:
Վիկտոր Գոնչարենկոն իր հերթին ասել է. «Պետք է մտածել միայն ֆուտբոլի մասին ու զբաղվել միայն ֆուտբոլով: Հուսով եմ, որ բոլոր ֆուտբոլասերները, որոնք կգան այստեղ, եւ անգլիացիները, որոնք կժամանեն Մոսկվա, կաջակցեն իրենց թիմերին եւ այլ բաների մասին չեն մտածի: Մենք՝ մարզիչներս եւ մարզիկները, պետք է մտածենք ֆուտբոլի, այլ ոչ թե քաղաքականության մասին: Դուք կարող եք գալ աշխարհի առաջնություն եւ համոզվել, որ մեր երկիրը լավն է, հիանալի մարդկանցով եւ գերազանց ստադիոններով»:
Աշոտ ՀԱԿՈԲՅԱՆ
