Այսօր վաղ առավոտից Երեւանի մի շարք փողոցներ փակ են: Փակ են Էջմիածին, Արմավիրի մարզ տանող ճանապարհները, «Զվարթնոց» օդանավակայան տանող ճանապարհը: Այս հատվածում քիչ առաջ ցուցարարները վիճաբանեցին քաղաքացիների հետ, վերջիններս դժգոհում էին ճանապարհի փակ լինելու համար, ոստիկանների միջամտությամբ քաղաքացիներն անցան փակ հատվածը:
«Ամեն ինչ անում են, որ մարդը վարչապետ չընտրվի, ինչի համար: Ամեն տարի պետք է գնամ Ռուսաստաններն աշխատե՞մ, է՞դ են ուզում»,- ոստիկաններին բողոքում էր ցուցարարներից մեկը:
Մի կին էլ խնդրեց ոստիկաններին միանալ՝ ասելով, որ ժողովուրդը հույս, հավատ կորցրել է. «Մեզ ստրուկի պես են պահում: Միացեք ժողովուրդ: Ոչ վիճում ենք, ոչ էլ: Թողեք մեր խաչմերուկները փակենք…երկիրն էս ինչ եք սարքել, էս Սամվել Ալեքսանյանինն է, էս՝ Տաշիր Սամոյինը: Ինչ եք ուզում մեզանից»:
Ոստիկանների հորդորին՝ ազատել փողոցը, ցուցարարները հակադարձեցին, թե ինչու մեկ շաբաթ առաջ, երբ ՀՀԿ-ական Առաքել Մովսիսյանն էր փակել ճանապարհը՝ թույլ չտալով Արմավիրի մարզի բնակիչներին Երեւան գալ ցույցերի մասնակցելու համար, ոստիկանները լուռ կանգնած էին ու այսօրվա պես չէին միջամտում, որ փողոցները բացվեն:
Ցուցարարներին է միացել նաեւ Մոսկվա մեկնող մի երիտասարդ, նա ասաց, որ երեք ժամից իր չվերթն է, բայց տեսնելով, որ փողոցը փակ է, ինքը օդանավակայան գնալու փոխարեն միացել է ցուցարարներին:
Օդանավակայան գնացողները մեքենաներից իջնում են ու ճամպրուկները ձեռքներին ոտքով են «Զվարթնոց» գնում:
Օդանավակայան տանող հատվածում լարված մթնոլորտ է, այստեղ սեւ համազգեստով ոստիկանների կուտակումներ են նկատելի:
Արփինե ՍԻՄՈՆՅԱՆ
