Հայաստանում Եվրոպական միության պատվիրակության կողմից կազմակերպվող Եվրոպայի օրն այսօր նշվեց նաեւ Վանաձորում: Այս տարի տոնը կրում ՝ «Եվրոպան այստեղ է» խորագիրը:
Պատասխանելով Aravot.am-ի այն հարցին, թե ինչ կարծիք ունի Հայաստանում կատարված թավշյա հեղափոխության մասին, Հայաստանում Եվրամիության դեսպան Պյոտր Սվիտալսկին պատասխանեց. «Այս ծանր քաղաքական ճգնաժամը, որը ժայթքեց Հայաստանում՝ իր լուծումը գտավ սահմանադրական, օրինական եւ խաղաղ ճանապարհներով, ինչն առաջին հերթին Հայաստանի Հանրապետության բնակչության եւ քաղաքական էլիտայի մեծագույն ձեռքբերումներից մեկն էր»:
Դեսպանի խոսքով` մեծ ու կարեւոր էր նաեւ երիտասարդների դերն ու ունեցած ներուժը, ինչը նրա խոսքով պետք է օգտագործել երկրի զարգացման համար. «Նրանք ունեն բավականին մեծ ակնկալիքներ, նրանք ցանկանում են ապրել մի երկրում, որը ձերբազատված է կոռուպցիայից, մի երկրում, որը պատշաճ ու արդյունավետորեն կառավարվում է, մի երկրում, որն ունի անկախ, անկողմնակալ, արդար դատաիրավական համակարգ: Նրանք ցանկանում են ապրել մի երկրում, որտեղ տնտեսական գործունեությունն իրականացվում է հավասար իրավունքների տրամադրմամբ, որտեղ չկան արտոնյալներ, չկան շուկայում գերակայող դիրքեր»:
Խոսելով Հայաստան-Եվրամիություն հարաբերությունների սերտացման եւ վիզաների ազատականացման մասին, Սվիտալսկին հույս հայտնեց, որ գործընթացը կգրանցի դրական արդյունք. «Անցած շաբաթ Հայաստան էին ժամանել իմ գործընկերները Եվրամիությունից: Օրակարգային հիմնական հարցը եղել է այցագրերի ազատականացման խնդիրը, բայց միաժամանակ եղել է այցեգրերի դյուրացման գործընթացի իրականացում: Որովհետեւ Հայաստանի Հանրապետությունը հիմա այդ գործընթացում է գտնվում, եւ եթե ավարտի, ապա դա լավ սկիզբ կդնի ազատականացման գործընթացը սկսելու համար: Այսինքն, շարժվում ենք ճիշտ ուղղությամբ, բայց եղեք համբերատար»:
Եվրամիությունը հանդիսանում է Հայաստանում ամենախոշոր ներդնողը: Դեսպանը տեղեկացրեց նաեւ, որ իրենք պլանավորում են առաջիկա 3 տարիների համար Հայաստանի զարգացման ուղղությամբ տրվող աջակցությունը ավելացնել մինչեւ 25 տոկոսով. «Մասնավորապես գալիք մի քանի ամիսների ընթացքում մենք պլանավորում ենք այս աջակցության մի մասը կենտրոնացնել ՀՀ 3 հյուսիսային մարզերում՝ Լոռի, Շիրակ եւ Տավուշ»:
Մանրամասները քիչ անց՝ տեսանյութում
Տաթեւիկ ՂԱԶԱՐՅԱՆ
