Վերաքննիչ քրեական դատարանում այսօր առավոտյան նախատեսված էր Ժիրայր Սեֆիլյանի եւ մյուսների գործով վերաքննիչ բողոքի քննությունը, որով ամբաստանյալները պահանջում են բեկանել առաջին ատյանի դատարանի որոշումը, այն է՝ ազատազրկում, եւ արդարացնել իրենց: Նիստերի դահլիճը բավականին բազմամարդ էր, քաղաքացիների մի մասն էլ դրսում էր մնացել, քանի որ նստելու տեղ չկար: Նիստը սկսվելուն պես վերաքննիչ քրեական դատարանի երեք դատավորները հայտարարեցին, որ ըստ ոստիկանության Երեւան քաղաքի վարչության պետի գրության, ամբաստանյալներին հնարավոր չի եղել դատարան ներկայացնել:
Քաղաքացիները դժգոհեցին, բղավեցին՝ թույլ չտալով, որպեսզի դատավորները մինչեւ վերջ ընթերցեն գրությունը եւ պարզ դառնար ամբաստանյալներին չներկայացնելու պատճառը: Դատավորները որոշում կայացրին նիստը հետաձգել, քանի որ քաղաքացիների աղմուկի պատճառով չէին կարողանում խոսքն ավարտել: Քաղաքացիները ի նշան բողոքի՝ շարունակում են մնալ դատարանի շենքում եւ ոստիկանությունից, մասնավորապես՝ ոստիկանապետ Վալերի Օսիպյանից, պահանջել, որպեսզի ոստիկանությունը ներկայացնի Սեֆիլյանին եւ մյուսներին: Ժիրայր Սեֆիլյանի եղբայրը՝ Թորոս Սեֆիլյանը հայտարարեց, որ շարունակելու են բողոքի գործողությունները:
Լուիզա ՍՈՒՔԻԱՍՅԱՆ
