Երեւանի ընդհանուր իրավասության դատարանի Շենգավիթի նստավայրում այսօր 2015թ. մահացած ծննդկան Մերի Մարգարյանի գործով հերթական դատական նիստն էր: Հունիսին պետք է հրապարակվեր այս գործով դատավճիռը, սակայն դատավոր Դավիթ Բալայանն անսպասելի որոշում էր կայացրել՝ գործի քննությունը սկսել նորից, քանի որ կրկնակի դատաբժշկական փորձաքննության կարիք կա: Այսօր դատարանը հրապարակեց որոշումը՝ կրկնակի դատաբժշկական փորձաքննություն անցկացնելու մասին:
Դատական նիստն այսքանով ավարտվեց: Առողջապահության նախարարի կողմից հանձնաժողովի կազմավորման եւ դրա անդամների անունները դատարան ուղարկելուց հետո կնշանակվի հերթական նիստը:
Հիշեցնենք, որ Մերի Մարգարյանի մահվան համար մեղադրվում են «Շենգավիթ» ԲԿ բժշկուհի Շուշանիկ Բախշյանը, որը վարել է հղիության ընթացքը եւ հերթապահ-բժշկուհի Անի Բաբելյանը: Նրանք իրենց մեղավոր չեն ճանաչել, իսկ Մերի Մարգարյանի հարազատները պնդել են, որ նրանց մասնագիտական պարտականությունների ոչ պատշաճ կատարման հետեւանքով են մահացել Մերի Մարգարյանը, իսկ հաջորդիվ՝ նորածինը:
Լուիզա ՍՈՒՔԻԱՍՅԱՆ
