«Հայ-ռուսական հարաբերությունների մասին այս ընթացքում ինչ ասես՝ լսեցինք: ՀՀԿ-ականներից մեկն այսօր արցունք էր թափում, թե որքան վատ են հայ-ռուսական հարաբերությունները»,-պաշտոնավարման 100 օրն ամփոփող հանրահավաքում այսօր հայտարարեց ՀՀ վարչապետ Նիկոլ Փաշինյանը: Նա հեգնեց ՀՀԿ-ականներին. «Քոռանա՜մ ես, այս ի՜նչ վատ վիճակում են հայ-ռուսական հարաբերությունները: Ռուսաստանի մեր գործընկերները ՀՀ-ում տեղի ունեցածը դեռ ամբողջությամբ չեն գնահատել, ուստի խոսել վատ լինելու մասին՝ ծիծաղելի է»: Վարչապետը հիշեցրեց, որ այս ընթացքում երկու անգամ հանդիպել է ՌԴ նախագահ Վլադիմիր Պուտինի հետ, երեք անգամ էլ՝ հեռախոսով խոսել. «Հայ-ռուս հարաբերությունները ոչ միայն վատ չեն, այլեւ ի հեճուկս ՀՀԿ-ի՝ լավ են ու ավելի լավանալու են»:
Ըստ Փաշինյանի՝ նոր կառավարության նպատակներից է հայ-ռուսական բարեկամության խորացումը եւ երկկողմ հարաբերությունները նոր մակարդակի բարձրացնելը. «Համապատասխան ընթացակարգերից հետո շուտով բոլորը կիմանան հայ-ռուսական համատեղ հումանիտար նախագծի մասին, որն աննախադեպ է ՀՀ-ի նորանկախ պատմության մեջ: Դա ապացույց է, որ մենք շարժվում ենք հայ-ռուսական հարաբերությունները նոր մակարդակի բարձրացնելու ճանապարհով»:
Փաշինյանը խոսք ուղղեց այն ռուս փորձագետներին, որոնք կարծում են, թե ՀՀ-ն «գնում» է դեպի Արեւմուտք. «ՀՀ-ն ոչ մի տեղ չի գնում, կանգնած է ուղիղ ողնաշարով՝ հպարտ քաղաքացիներով: Հայ-ռուսական ռազմավարական բարեկամությունը զարգանալու է: Զարգացնելու ենք մեր հարաբերությունները նաեւ Եվրամիության հետ: Մենք եւ Իրանի, եւ ԱՄՆ-ի հետ հարաբերություններում մեր շահերն ենք պաշտպանում: Նախորդ իշխանություններն իրենց կեցվածքով այնպես են արել, որ շատ վատ երեւույթներ կապվել են Ռուսաստանի հետ: Այդ նախորդ իշխանություններն են իրենց կոռուպցիայի պատասխանատվությունը գցել դրսի ուժերի վրա, իսկ հիմա, երբ բանտի ճանապարհին են, զանգում են Ռուսաստան ու ասում, թե մենք Ռուսաստանի դեմ ենք: Մ՜ի զանգեք, այդ զանգերը ձեզ չեն փրկելու, Մոսկվայում միամիտներ չկան»:
Լուիզա ՍՈՒՔԻԱՍՅԱՆ
