Սեպտեմբերի 30-ին՝ ժամը 18.00-ին, ավարտվեց Արագածոտն, Արարատ, Արմավիր, Գեղարքունիք, Լոռի, Կոտայք, Շիրակ, Սյունիք, Տավուշ մարզերի համայնքների տեղական ինքնակառավարման մարմինների հերթական և արտահերթ ընտրություններում ավագանու և համայնքի ղեկավարի թեկնածուների առաջադրման ժամկետը:
Aravot.am-ը ԿԸՀ կայքից տեղեկացավ՝ Արմավիր քաղաքում առաջադրվել է չորս թեկնածու՝ անկուսակցական Ժիրայր Աբրահամյանը, քաղաքապետի ներկայիս ժ/պ ՔՊ-ից Դավիթ Խուդաթյանը, անկուսակցական, ճարտարագետ «ՀԷԾ» ՓԲԸ «Մուսալեռ» մասնաճյուղի կուրսանտների վերլուծական և էներգիա իրացման բաժնից Օհան Հարությունյանը,անկուսակցական, իրավաբան Սևակ Մինասյանը:
Վաղարշապատ (Էջմիածին) համայնքի ղեկավարի պաշտոնի համար հայտ է ներկայացրել է 11 թեկնածու: Նրանցից 9-ը անկուսակցական են, թեկնածուների շարքում է նաև համայնքի ղեկավարի պաշտոնակատար, ՔՊ-ական Դիանա Գասպարյանը, «Լուսավոր Հայաստան» կուսակցությունից Սերգեյ Սարգսյանը: Անկուսակցական թեկնածուների շարքում է Էջմիածնի նախկին փոխքաղաքապետ Վազրիկ Գրիգորյանը: Նա ժամանակին Գրիգորյանների մտերիմն էր, բայց նրան այժմ ուզում է պաշտպանել «Դոն Պիպոյի» թիմը։
Հրազդանի համայնքի ղեկավարի պաշտոնի համար առաջադրվել է չորս թեկնածու՝ 3 անկուսակցականներ՝ Մանվել Պողոսյան, Լևոն Ստեփանյան, Դավիթ Քոչարյան և Սասուն Միքայելյանի ՔՊ-ական որդին՝ Սևակ Միքայելյանը:
Կապանում ևս համայնքի ղեկավարի պաշտոնի համար առաջադրվել է 4 թեկնածու. 3-ը անկուսակցականներ են՝ Էդգար Հովհաննիսյան, Արմեն Ղազարյան, Գևորգ Փարսյան և ՔՊ-ական Նարեկ Բաբայանը:
Տաթև ՀԱՐՈՒԹՅՈՒՆՅԱՆ
