Հայաստանի և Ռուսաստանի միջև իսկապես բանակցություններ են ընթանում Հայաստանի կենսաբանական լաբորատորիաներում օտարերկրացի զինվորականների բացակայությունը երաշխավորելու ուղղությամբ: Այս մասին այսօր տեղի ունեցած մամուլի ասուլիսում հայտարարել է Հայաստանում Ռուսաստանի դեսպան Սերգեյ Կոպիրկինը՝ հստակեցնելով Ռուսաստանի արտգործնախարար Սերգեյ Լավրովի՝ երեկ արված հայտարարությունը:
Այնուամենայնիվ, դեսպանը նշել է, որ ոչ մեկը ոչ մեկին չի կարող որևէ բան արգելել:
«Խոսքը հայ-ռուսական հարաբերությունների, երկու ինքնիշխան, իրավահավասար պետությունների մասին է»,- ասել է նա:
Դեսպանը նաև նշել է, որ բանակցություններ ընթանում են ոչ միայն Հայաստանի, այլև ևս մի քանի հետխորհրդային պետությունների հետ:
«Հայկական կողմի հետ երկխոսությունը բավականին կառուցողական է, կա փոխըմբռնում: Ես չեմ բացառում, որ ինչ-որ փուլում մենք ընդհանուր հայտարարի կգանք: Չեմ կարող ասել՝ ինչ տեսք դա կունենա: Ոչ մի արգելքի մասին խոսք չի կարող լինել: Հարցը դեռևս քննարկվում է. երբ կկնքվի համաձայնագիրը և ինչ տեսք կունենա՝ ես չեմ կարող ասել»,- նշել է Կոպիրկինը:
Պատրաստեց՝ Վիկտորյա ԱՆԴՐԵԱՍՅԱՆԸ
