Փետրվարի 17-ին Արմավիրի մարզի Մարգարա համայնքում կայացան ավագանու անդամների արտահերթ ընտրություններ: Ինչպես Aravot.am-ի հետ զրույցում նշեց Մարգարայի միջնակարգ դպրոցի ուսումնական մասի վարիչ Նաիրա Մարտիրոսյանը, իրենց գյուղի բնակիչները սահմանապահներ են, քանի որ Մարգարան սահմանակից է Թուրքիային: Այստեղ հիմնականում մշեցիների սերունդներ են:
Տիկին Մարտիրոսյանի հավաստմամբ, գյուղում ընտրությունները միշտ էլ խաղաղ են անցնում, ավագանու այս ընտրություններին եւս միջադեպեր չեն գրանցվել: Ինքը եւս ավագանու թեկնածուներից մեկն էր, որն անցել է: 13-րդ թեկնածուներից ամենաշատ ձայներն է հավաքել եւ 3-րդ անգամ է ընտրվում:
Մարգարայի համայնքի ղեկավարի ընտրությունը հունիսին էր կայացել, որից հետո ավագանու 3 անդամներ ինքնաբացարկ են հայտնել, ու ավագանին լուծարվել էր, դրա համար էլ արտահերթ ընտրություններ կայացան:
Մեր զրուցակիցը նշեց, որ ինչպես ՀՀ բոլոր համայնքներում, այնպես էլ Մարգարայում կան խնդիրներ, որոնք լուծված են, կան նաեւ առաջնահերթության կարգով լուծման կարոտ հարցեր, որոնք առնչվում են, օրինակ` խմելու եւ ոռոգման ջրի հետ:
Քանի որ Նաիրա Մարտիրոսյանը Մարգարայի դպրոցի փոխտնօրեն է, նրանից դպրոցի մասին էլ հետաքրքրվեցինք: Պարզվեց, որ այս տարվանից ընդգրկված են ներառական կրթության ծրագրում, ունեն կրթության առանձնահատուկ պայմանների կարիք ունեցող մեկ աշակերտ, որի հետ փորձում են տանն աշխատել:
Գոհար ՀԱԿՈԲՅԱՆ
