Լեռնային Ղարաբաղում իրավիճակի սրումը ՀԱՊԿ շրջանակներում խորը վերլուծության ու քննարկումների թեմա է, ասել է ՌԴ նախագահի մամուլի խոսնակ Դմիտրի Պեսկովը։
«Անխոս, ներկայիս իրավիճակը, ներկայիս ռազմական գործողությունները շփման գծում կազմակերպության շրջանակներում խորը վերլուծության թեմա է։ Ռուսաստանը տարբեր մակարդակներով կապի մեջ է թե՛ Երևանի, թե՛ Բաքվի, թե՛ Անկարայի հետ։ Մենք տեղեկություններ ենք հավաքում շփման գծում իրադարձությունների մասին և ուշադիր հետևում ենք նորություններին՝ մեր ապագա դիրքորոշումը ԵԱՀԿ-ում մեր գործընկերների հետ ձևակերպելու համար։
Կրեմլը բոլոր երկրներին, այդ թվում ՌԴ գործընկերներին ու հատկապես Թուրքիային կոչ է արել անել հնարավոր ամեն բան՝ կրակը դադարեցնելու և բանակցություններին վերադառնալու համար։
«Ռուսաստանը գործընկեր երկրներին, այդ թվում՝ Թուրքիային կոչ է անում Հայաստանի և Ադրբեջանի միջև հակամարտությունը վերադարձնել քաղաքական և դիվանագիտական հուն»,- ասել է Պեսկովը՝ անդրադառնալով Թուրքիայի ԱԳ նախարար Մևլութ Չավուշօղլուի հայտարարությանը, թե Թուրքիան պատրաստ է օգնել Ադրբեջանին թե՛ բանակցությունների սեղանի շուրջ, թե՛ մարտի դաշտում։
Կարդացեք նաև
«Կրեմլում առաջին հերթին կարծում են, որ անհրաժեշտ է դադարեցնել մարտական գործողությունները։ Ռազմական աջակցության մասին ցանկացած հայտարարություն միանշանակ յուղ է լցնում կրակին։ Մենք կտրականապես դեմ ենք դրան և համաձայն չենք հարցի նման ձևակերպմանը»,- ասել է Պեսկովը՝ անդրադառնալով այն դիտարկմանը, թե արդյոք ՀԱՊԿ շրջանակներում Հայաստանին ռազմական օգնություն կարող է ցուցաբերվելու։
Պատրաստեց Վիկտորյա ԱՆԴՐԵԱՍՅԱՆԸ
