Վաղը կառավարության նիստն է: Այդ իսկ պատճառով այսօր վարչապետ Նիկոլ Փաշինյանի հրաժարականի պահանջով հանրահավաքում ՀՅԴ անդամ Գեղամ Մանուկյանը հայտարարեց, որ վաղը, որպես բողոքի գործողություն պետք է շրջապատեն կառավարության շենքը. «Դիմում եմ բոլորիդ, ովքեր այս օրերին հազարավոր անգամներ մոտեցել են, բազմաթիվ առաջարկներ են արել, դիմում ենք մեր բոլոր հայրենակիցներին, ովքեր տարբեր առիթներով մասնակցել են հանրահավաքներին ու ասել են, որ պետք է շատ արագ գործել, գիտակցում են, որ ամեն րոպեն, վայրկյանը թանկ է, դիմում եմ բոլորիդ, վաղը առավոտյան ժամը 10-ից, ով կուզի՝ ավելի շուտ, շրջափակվում է ՀՀ կառավարությունը՝ բոլոր կողմերից: Ո՛չ ֆինանսների նախարարություն, ո՛չ Մելիք Ադամյան, ո՛չ կենտրոնական մուտք, ո՛չ աշխատակազմի մուտք, որեւէ կողմից Հայաստանի կառավարությունը հնարավորություն չունենա ելքի ու մուտքի: Նրանց նիստերը վաղուց արդեն կոպեկի արժեք չունեն: Նրանք չպետք է վաղը կայացնեն կառավարության նիստ: Նիկոլ Փաշինյանը վաղը պետք է զրկվի իբրեւ վարչապետ կառավարության նիստ անելու հնարավորությունից, այստեղից դուրս գալու հնարավորությունից»:
Գեղամ Մանուկյանն ասաց, որ իրենք հրապարակում են մնալու մինչեւ առավոտ:
Հռիփսիմե ՋԵԲԵՋՅԱՆ
