Փաստաբան Գոռ Սաղոյանը ՖԲ էջում տեղեկացնում է. «Ապօրինի քաղաքական հետապնդման հետևանքները. Իսրայել Հակոբկոխյանը երեկ սրտի կաթված է ստացել: Փառք Աստծուն, հիմա ամեն ինչ կարգին է»:
Հայտնի դարձավ, որ բժշկական հետազոտություններ անցկացնելուց հետո՝ ստենդավորել են բռնցքամարտիկի սրտի երկու անոթները:
Հիշեցնենք, որ ՀՀ սպորտի վաստակավոր վարպետ, բռնցքամարտիկ Իսրայել Հակոբկոխյանի ձերբակալումը դատարանը ճանաչել էր ոչ իրավաչափ, կալանքի միջնորդությունը մերժվել էր:
Հունվարի 28-ին ՀՀ վարչապետ Նիկոլ Փաշինյանի հրաժարականի պահանջով հայահավաքի ընթացքում 21 անձ բերման էր ենթարկվել ՀՀ քրեական օրենսգրքի 219-րդ հոդվածի հատկանիշներով՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելու կամ դրանք պահելու կասկածանքով։ Նույն հոդվածի հատկանիշներով հարուցվել է քրեական գործ, որի շրջանակներում հինգ անձ ձերբակալվել էր՝ Արագած Ախոյանը, Արշակ Զաքարյանը, Վահագն Չախալյանը, Տիգրան Չոբանյանը և Իսրայել Հակոբկոխյանը։
