ԱԺ-կառավարություն հարցուպատասխանի ժամանակ այսօր «Լուսավոր Հայաստան» խմբակցության պատգամավոր Արմեն Եղիազարյանը մեջբերեց ՀՀ հաշվեքննիչ պալատի զեկույցը 2019թ․-ին պետական կառույցներում գրանցված չարաշահումների մասին։ Եղիազարյանը, դիմելով վարչապետի պաշտոնակատար Նիկոլ Փաշինյանին, ակնարկեց, որ զեկույցն իր իշխանության օրոք գրանցված դեպքերի մասին է։ Փաշինյանն արձագանքեց․ «Ողջունում եմ պալատի բոլոր բացահայտումները։ Իրավապահները պետք է քննեն բոլոր դեպքերը եւ մեղավորներին պատասխանատվության ենթարկեն։ Ցավում եմ, որ իրավապահները երբեմն անտեղի ներողամտություն են ցուցաբերում որոշ իրավախախտների հանդեպ։ Չարաշահումների բոլոր դեպքերը պետք է պատշաճ քննվեն»։
Արմեն Եղիազարյանը պատասխանեց, որ կոռուպցիոն սխեմաներից մեկը Փաշինյանի թիմակիցն է ղեկավարել, եւ այստեղ նախկինների խնդիր չկա։ Փաշինյանը նշեց․ «Պարոն Եղիազարյան, ուշադիր ինձ նայեք։ Իմ նշանակած երկու պաշտոնյաներ արդեն 1,5 տարի բանտում են՝ ատկատ անելու, կաշառք վերցնելու մեղադրանքով։ Մեր կուսակցության անդամ, իմ քաղաքական մերձավոր մարդկանց մասին է խոսքը։ Ձեր հարցով այդ ի՞նչ նկատի ունեք»։
Լուիզա ՍՈՒՔԻԱՍՅԱՆ
