Շիրակի մարզը 1500 դեղաչափ գերմանական «AstraZeneca » և 342 դեղաչափ ռուսական «Sputnik-V» պատվաստանյութ է ստացել: Այս մարզում ապրիլի 15-ից սկսած մինչև օրս պատվաստվել է 409 քաղաքացի, գերմանական պատվաստանյութով՝ 242, իսկ ռուսականով՝ 167-ը:
Այս մասին տեղեկանում ենք Շիրակի մարզպետարանի ֆեյսբուքյան պաշտոնական էջից։
Այսօր պատվաստվել են նաև Շիրակի երկու փոխմարզպետները՝ Դավիթ Սեխլեյանն ու Պողոս Աբրահամյանը։ Իսկ մինչ նրանց պատվաստվելը, ողջ մարզի, ինչու չէ նաև հանրապետության չպատվաստված բոլոր բնակիչների համար օրինակ է ծառայել Շիրակի մարզպետ Հովհաննես Հարությունյանը, որը մասնագիտությամբ բժիշկ է։
Կարդացեք նաև
Նա պատվաստվելուն զուգընթաց նկարահանվել է ՀՀ առողջապահության նախարարության պատրաստած տեսահոլովակում՝ բնակիչներին կոչ անելով հենց այսօր պատվաստվել։
«Վաղվա հաջողությունները կախված են այսօրվա Ձեր վարքագծից: Մի սպասեք վտանգի հետ առերեսմանը, պատվաստվեք այսօր»,- տեսահոլովակում ասում է Շիրակի մարզպետ Հովհաննես Հարությունյանը:
Նշենք, որ շուտով պատվաստումներ կիրականացնեն ոչ միայն պոլիկլինիկաներում, այլ սուպերմարկետների ու մոլերի մոտ տեղակայված բուժկետերում։ Մտադրված են հատուկ պատվաստակետեր տեղադրել՝ խանութներ ելումուտ անող բնակիչների համար։
Այս մասին Aravot.am-ի հետ զրույցում տեղեկացրել էր Գյումրու «Միջազգային կարմիր խաչի» անվան պոլիկլինիկայի տնօրեն Հովհաննես Վարձելյանը։
Նունե ԱՐԵՎՇԱՏՅԱՆ
Լուսանկարը՝ Շիրակի մարզպետարանի
